BQO densaýlyq saqtaý basqarmasynyń burynǵy basshysyna qatysty úkim ózgerissiz qaldy

ORAL. QazAqparat – BQO sotynyń qylmystyq ister jónindegi apellıatsııalyq sot alqasy oblystyq densaýlyq saqtaý basqarmasynyń burynǵy basshysy Bolatbek Kaıýpovqa qatysty qylmystyq isti qarady, dep habarlaıdy QazAqparat tilshisi.

BQO sotynyń baspasóz qyzmeti málim etkenindeı, apellıatsııalyq sot alqasy B.Kaıýpov jáne para alýda deldaldyq jasaǵan Serik Turalıev pen Aıdos Sebepovke qatysty birinshi satydaǵy sot úkimin ózgerissiz qaldyrdy.

Osylaısha B.Kaıýpov pen onyń qorǵaýshylarynyń apellıatsııalyq shaǵymdary qanaǵattandyrylmady.

Sot alqasy sottalýshylardyń áreketteri birinshi saty sotymen durys saralanǵan dep tapty.

Taraptarǵa isti kassatsııalyq tártipte qaıta qaraý týraly ótinim nemese narazylyqty QR Joǵarǵy sotyna QPK-niń 487-babyna sáıkes berýge bolatyny jóninde túsindirildi.

Eske sala keteıik, budan buryn BQO densaýlyq saqtaý basqarmasynyń burynǵy basshysy 7,8 mln teńge para alǵany úshin sottalǵanyn jazǵan bolatynbyz.