BQO densaýlyq saqtaý basqarmasy respýblıkalyq reıtıngte birinshi oryndy ıelendi

ORAL. QazAqparat - BQO densaýlyq saqtaý basqarmasy 2016 jyldyń qorytyndysy boıynsha densaýlyq saqtaýdy damytý respýblıkalyq ortalyǵy jarııalaǵan reıtıngte birinshi oryndy ıelendi, dep habarlaıdy «QazAqparat» HAA tilshisi.

Basqarmanyń baspasóz hatshysy Flıýra Samatovanyń aıtýynsha, óńirlerdi densaýlyq saqtaýdyń negizgi kórsetkishteri boıynsha baǵalaǵan. Sonyń ishinde adam ómiriniń uzaqtyǵy, túrli aýrýlardan ólim-jitimniń, analar men sábıler óliminiń tómendeýi, dáriger kadrlary tapshylyǵynyń sheshilýi, medıtsına mekemeleri qyzmetiniń tıimdiligi jáne basqalar bar. Osylaısha, damý kórsetkishteri boıynsha BQO kósh bastasa, SQO ekinshi, Qyzylorda oblysy úshinshi orynǵa kóterilgen.
 

Aıta keteıik, oblystyq densaýlyq saqtaý basqarmasy sońǵy jyldary dáriger tapshylyǵyn sheshý maqsatynda naqty jumystardy júrgizip keledi. Bıyldyń ózinde basqarma ókilderi  Aqtóbedegi M.Ospanov atyndaǵy Batys Qazaqstan memlekettik medıtsına ýnıversıtetiniń 200-den astam bitirýshilerimen kezdesken. Sonyń nátıjesinde oblysqa 80 maman keledi dep kútilýde. Olardyń arasynda 45 jalpy tájirıbe dárigeri, 6 terapevt, 8 hırýrg, 12 qoǵamdyq densaýlyq saqtaý mamany bar. Oǵan qosa akýsher, gastroenterolog, ýrolog, lor, kardıolog, anestezıolog kelmekshi. Olar birinshi kezekte aýyldyq jerlerge, sodan keıin emhanalarǵa, oblystyq kópbeıindi balalar aýrýhanasy men juqpaly aýrýlar aýrýhanasyna, kardıologııalyq ortalyqqa jiberiledi.
 

Aldaǵy ýaqytta elimizdegi basqa da medıtsınalyq JOO túlekterimen sóılesip, kelisim jumystaryn júrgizý kózdelýde.

Qazirgi tańda oblysta 1586 dáriger jumys jasaıdy. Barlyǵy 55-teı dáriger jetispeıdi. Atalǵan mamandar kelgen jaǵdaıda bul tapshylyq joıylady dep josparlanýda.