BQO Densaýlyq saqtaý basqarmasy basshysy para alý kúdigimen ustaldy

NUR-SULTAN. QazAqparat – Batys Qazaqstan oblysy Densaýlyq saqtaý basqarmasynyń basshysy para alý kúdigimen ustaldy. Bul týraly QR Sybaılas jemqorlyqqa qarsy is-qımyl agenttigi 1-shi departamentiniń asa mańyzdy ister jónindegi tergeýshisi Danııar Bıǵaıdarov málim etti, dep habarlaıdy QazAqparat.

«Ótken 2 aptada Sybaılas jemqorlyqqa qarsy qyzmet sotqa deıingi 80-nen astam tergeýdi tirkedi. 8 laýazymdy tulǵa ustaldy, 6 adamǵa qatysty «kúzetpen ustaý» bultartpaý sharasy qoldanyldy», - dedi dedi D. Bıǵaıdarov Facebook paraqshasynda ótken onlaın brıfıngide.

Onyń sózine qaraǵanda, Batys Qazaqstan oblysy boıynsha Sybaılas jemqorlyqqa qarsy qyzmet «Batys Qazaqstan oblysynyń Densaýlyq saqtaý basqarmasy» MM basshysy men onyń sybaılasyna qatysty tergeýdi bastady.

«Olar 2020 jylǵy 12-23 qazan aralyǵynda kompanııa dırektorynan jalpy somasy 78 000 000 teńgege medıtsınalyq jabdyqtardy jetkizýge memlekettik satyp alý týraly JShS-men buryn jasalǵan sharttar boıynsha oryndalǵan jumystar men qabyldaý aktilerine kedergisiz qol qoıý úshin para túrinde jalpy somasy 7 800 000 teńge alǵan», - dedi agenttik ókili.

Belgili bolǵandaı, memlekettik mekemeniń basshysy jáne onyń sybaılasy QR QPK 128-baby tártibinde ustalyp, Oral qalasynyń polıtsııa basqarmasynyń ýaqytsha ustaý abaqtysyna qamaldy.