BQO dene shynyqtyrý jáne sport basqarmasynyń basshysy Jeńis Nyǵmetýllın sportshylardy qabyldady
ORAL. KAZINFORM – Batys Qazaqstan oblystyq dene shynyqtyrý jáne sport basqarmasynyń basshysy Jeńis Nyǵmetýllın Qazaqstan tarıhynda short-trekten álem chempıonatynyń alǵashqy júldesin jeńip alǵan Alına Ajǵalıeva men bapkerlerin qabyldady.
Eske salsaq, Alına Polshanyń Gdansk qalasynda ótken short-trekten jasóspirimder arasyndaǵy álem chempıonatynda 1500 metr qashyqtyqqa jarysýdan fınalǵa shyǵyp, márege ekinshi bolyp kelgen bolatyn.
Basqarma basshysy Alınany tarıhı jeńisimen quttyqtap, aldaǵy qatysatyn dúbirli dodalarda da top jarýyna tilegin bildirdi.
Kezdesý sońynda Alınaǵa syılyq tabys etildi.
Ajǵalıeva Alına – qysqy sport túrleri boıynsha oblystyq balalar-jasóspirimder sport mektebiniń short-trek bóliminde 4 jylǵy sporttyq jetildirý tobynyń sportshysy, halyqaralyq dárejedegi sport sheberi. Batys Qazaqstan ınnovatsııalyq-tehnologııalyq ýnıversıtetiniń 2 kýrs stýdenti.
Jetistikteri:
Short-trekten jasóspirimder, jastar, eresekter arasyndaǵy Qazaqstan Respýblıkasy Chempıonattarynyń birneshe dúrkin chempıony;
2019 j. «Detı Azıı» halyqaralyq oıyndarynda 2 oryn;
2023 j. dúnıejúzilik ýnıversıadada 2 oryn;
2023 j. Álem Kýbogynyń kezeńinde 3 oryn;
2023 j. Qazaqstan Respýblıkasynyń IV Qysqy jastar oıyndarynda 1 oryn.
2024 j. aqpanda Álem Kýbogynyń kezeńinde 2 oryn;
2024 j. ıýnıorlar arasynda Álem chempıonatynda 2 oryn.
