BQO delegatsııasy Tszınchjoýdaǵy munaı-hımııa óndirisimen tanysty
ORAL. KAZINFORM — Aımaq basshysy Narıman Tóreǵalıev bastaǵan batysqazaqstandyq delegatsııa Qytaı Halyq Respýblıkasynyń Lıaonın provıntsııasyna jasaǵan jumys sapary aıasynda Tszınchjoý qalasyna bardy.
2 myń jyldan astam tarıhy bar shejireli shahar Qytaıdyń soltústik-shyǵysynda, Bohaı shyǵanaǵynyń jaǵalaýynda ornalasqan. Búginde munda 3 mıllıonǵa jýyq adam turady. Strategııalyq mańyzy bar portty qala qurlyq pen teńiz qatynastarynda áleýeti joǵary halyqaralyq torap retinde iri saýda ortalyǵyna aınalyp keledi.
Óńir delegatsııasy óndiristik nysandardy aralap, ozyq tehnologııalarmen tanysty. Alǵashqy ekijaqty yntymaqtastyq kezdesý PetroChina Jinzhou Petrochemical Company kásipornynda ótti. Kompanııanyń atqarýshy dırektory ıÝan Tsınbın zaýyt tarıhy men áleýetin tanystyrdy. Jyldyq tabysy 30 mlrd ıýannan asatyn kásiporynda 6 myńnan astam jumysshy eńbek etedi. Otyn-hımııa kesheni elektromobıl batareıalary men bolat balqytý peshterine asa qajet joǵary tózimdi kómirtekti materıal óndirý kólemi jóninen álem boıynsha kósh bastap tur. Kompanııa smartfondar men kompıýter chıpterin tazalaýǵa arnalǵan G3 jáne G5 klasty elektrondy tehnıkalyq spırt shyǵaryp, Qytaıdyń joǵary tehnologııalyq ónerkásibin ımportqa táýeldilikten aryltty. Tsıfrlyq sheshimder engizýde de ozyq tájirıbe qalyptasqan, óndiris tolyq avtomattandyrylǵan.
Kezdesýde oblys ákiminiń orynbasary Tilepbergen Kaıýpov aımaqtyń ınvestıtsııalyq áleýetin tanystyryp, óńir ekonomıkasyn ártaraptandyrýdyń mańyzyna toqtaldy.
— Bıylǵy 4 aıda negizgi kapıtalǵa tartylǵan ınvestıtsııalar kólemi 182,6 mlrd teńgeni qurap, 2025 jylǵy sáıkes kezeńmen salystyrǵanda 17 paıyzǵa artty. Kórsetkishterdi odan ári jaqsartýǵa áleýetimiz tolyq jetedi. Batys Qazaqstan oblysy Qytaıdyń 5 birdeı provıntsııasymen tyǵyz baılanys ornatty. Kúni keshe oblystyń ákimshilik ortalyǵy men Tszınchjoý baýyrlas qalalar atandy. Bul qadam ekijaqty yntymaqtastyq pen iskerlik baılanysqa tyń serpin beredi dep senemiz, — dedi Tilepbergen Kaıýpov.
Kezdesý qorytyndysy boıynsha qos tarap aldaǵy ýaqytta birlese jumys isteýge jáne ortaq jobalardy iske asyrý múmkindikterin jan-jaqty talqylaýǵa ýaǵdalasty.
