BQO delegatsııasy Saratov oblysynda ótken Naýryz toıyna baryp qaıtty
Batysqazaqstandyq delegatsııany Saratov oblysynyń vıtse-gýbernatory Igor Pıvovarov qabyldap, kezdesýde qos óńir arasyndaǵy yntymaqtastyqty odan ári damytý máseleleri sóz boldy.
Naýryz merekesine Saratov óńiriniń ár aýdanynda turatyn qandastarymyz kelip, bir-birimen qushaq jaıa kórisip, mereıleri ósip qaldy. Ortalyq saıabaqta jıyrmaǵa jýyq aq shańqan kıiz úı tigilip, kórme, jármeńkeler uıymdastyryldy. Kelýshilerge naýryz kóje usynylyp, as berildi. Ónerpazdar qazaq batyrlarynyń beınesinde qarsy alsa, ulttyq kıim kıgen aqsaqal-ájelerden bastap jastarǵa deıin túrli sharalarǵa belsene qatysty.
Mádenıet úıinde ótken kontserttik baǵdarlamada saratovtyq ártistermen birge Batys Qazaqstan oblysynan arnaıy barǵan «Nazerke» halyqtyq bı ansambli óz ónerlerin kórsetti.
Naýryz merekesiniń yntymaq-berekeni arttyratyn ıgi dástúr ekendigin atap ótken Igor Pıvovarov Saratov pen Batys Qazaqstan oblystary arasynda ekonomıka, bıznes, mádenıet, óner syndy salalarda tyǵyz baılanys ornaǵandyǵyn jetkizdi. Saratov oblysynda da túrli ult ókilderiniń meıramdary ortaq mereke retinde toılanady.
Saratovtyq aǵaıyndardy quttyqtaǵan BQO ákimi Altaı Kólginovtiń atap ótkenindeı, Aq Jaıyqta san ult ókilderi tatý-tátti ǵumyr keshýde. Bul oraıda Elbasy bastamasymen qurylǵan Qazaqstan halqy Assambleıasy kóptegen isterge uıtqy bolyp keledi. Ásirese, ótken jyldyń aqpanynda Oralda Dostyq úıi ashylǵannan keıin óńirdegi barlyq etnomádenı birlestikterdiń óz mádenıetin, salt-dástúrin, tilin saqtap, damytýyna tolyq jaǵdaı jasaldy.
Saratov oblysyndaǵy Qazaq ulttyq-mádenı avtonomııasynyń teń tóraǵasy Rýslan Bısenǵalıevtiń aıtýynsha, óńirde 2 mln. astam halyq bolsa, sonyń 80 myńnan astamy - qazaqtar. Oblysta Naýryz meıramy 1988 jyldan beri toılanyp keledi. Eń bastysy, ulttyq salt-dástúr men mádenıetti damytýǵa basa kóńil bólinýde. Keıingi jastardyń ana tilin umytpaýy úshin qadamdar jasalýda. Mysaly, taıaýda Engels aýdanynda qazaq tilin úıretetin kýrstar ashylmaqshy. Bul rette Qazaqstannan ádistemelik jáne basqalaı kómek kórsetilip turady.
Aıta keteıik, Naýryz merekesi Saratov oblysynda jyl saıyn ár aýdanda kezekpen uıymdastyrylyp keledi. Mysaly, 2016 jyly Aleksandrov Gaı aýdanynda ótse, aldaǵy jyly Krasnyı Kýt aýdanynda jalǵaspaqshy.
