BQO-dan úzdik segiz shyǵarma respýblıkalyq kezeńge joldanbaq
ORAL. QazAqparat - Oraldaǵy Dostyq úıinde «Qazaqstan Respýblıkasynyń Táýelsizdigine 25 jyl» taqyrybynda memlekettik tilde ótkizilgen jalpyrespýblıkalyq shyǵarmalar baıqaýynyń oblystyq kezeńi qorytyndylanyp, úzdik segiz jumys belgili boldy, dep habarlaıdy QazAqparat.
BQO ákimi apparaty «Qoǵamdyq kelisim» kommýnaldyq memlekettik mekemesi basshysynyń orynbasary Jamal Ihsanovanyń aıtýynsha, «Uly dala eli - Táýelsizdiktiń 25 negizi» respýblıkalyq is-sharalar josparyna sáıkes, memlekettik tildiń mártebesin arttyrý, jas urpaqtyń boıynda elge degen maqtanysh pen otanshyldyq sezimin uıalatý maqsatynda uıymdastyrylǵan baıqaýǵa barlyǵy 164 adam qatysty. Negizinen joǵary synyp oqýshylary men stýdentter bolǵanymen, olardyń arasynda qarapaıym turǵyndar da bar. Olar memlekettik tildi tym-táýir meńgergendigin kórsetti. Mysaly, «Oral «Servıs» tehnologııalyq kolledjinde 27 ulttyń ókili oqysa, olardyń deni qazaq tilin jaqsy biledi.
Qazylar alqasynyń sheshimimen segiz úzdik jumys anyqtalyp, júldegerler «Qoǵamdyq kelisim» mekemesiniń alǵyshattarymen, baǵaly syılyqtarymen marapattaldy.
BQO bilim basqarmasynyń bas mamany Lázzat Dúısenbaeva bıylǵy shyǵarmalardyń jalpy deńgeıi joǵary ekendigin atap ótti.
«Men qazaq jerinde, atap aıtqanda, Qaztalov aýdany Jalpaqtal aýylynda dúnıege kelgenimdi maqtan tutamyn. Kishkentaıymnan qazaq balalarymen birge oınap óskendikten, memlekettik tildi meńgerý qıynǵa túsken joq. Jalpy, bári nıet-tilek, qulshynysqa baılanysty. Qazir ózim bilip alyp jatqan «Oral «Servıs» tehnologııalyq kolledjinde de túrli ult ókilderi, bárimiz birge júremiz. Atalmysh baıqaýda júldegerler qatarynan kóringenime qýanyshtymyn. Endi Astanada ótetin qorytyndy kezeńge qatysyp, búkil Qazaq eli maqtanysh tutatyn elordany kórsek, tipti keremet bolar edi», - dedi Ekaterına Vologına.
Aıta keteıik, atalǵan segiz úzdik jumys Astanada ótetin respýblıkalyq kezeńge joldanbaq.
