BQO-dan Senat depýtattyǵyna kandıdattar saılaýaldy úgit jumystaryn júrgizýde
ORAL. QazAqparat - Batys Qazaqstan oblysynda Senat depýtattyǵyna úmitkerler anyqtalyp, saılaý aldyndaǵy úgit jumystary júrgizilýde.
Bul týraly búgin Ortalyq kommýnıkatsııalar qyzmetiniń óńirlik fılıalynda oblystyq saılaý komıssııasynyń tóraǵasy Ǵaısa Qapaqov málim etti, dep habarlaıdy «QazAqparat» tilshisi.
Onyń aıtýynsha, oblystan depýtattyqqa úmitker retinde 5 adam ózin-ózi usyndy. Senat depýtattyǵyna kandıdattardyń usynǵan qujattaryn olardyń Konstıtýtsııanyń jáne «Qazaqstan Respýblıkasyndaǵy saılaý týraly» Konstıtýtsııalyq zańynyń 73-babynyń talaptaryna sáıkestigin teksere kele, oblystyq saılaý komıssııasy Batys Qazaqstan oblysynan Senat depýtattyǵyna kandıdat retinde Narıman Tóreǵalıevti, Valerıı Goloýhov pen Nurjan Sertekovti tirkedi. Al Marat Ábdirahmanov pen Qazybaı Bozymov óz ótinishterimen kandıdatýralaryn alyp tastady.
«27 maýsymǵa deıin úgit jumystary júrgiziletin bolady. Ol úshin tańdaýshylarmen kezdesý ótkizý kestesi bekitildi. Kúntizbelik josparǵa saı buqaralyq aqparat quraldarynda oblystyq saılaý komıssııasynyń quramy, tirkelgen kandıdattar týraly málimetter jarııalandy. Jýyrda Ortalyq saılaý komıssııasynyń múshesi Lázzat Súleımenniń qatysýymen oblystyq semınar-keńes ótip, oǵan aýmaqtyq saılaý komıssııalarynyń tóraǵalary men hatshylary, qalalyq, aýdandyq máslıhattardyń hatshylary, qalalyq ýchaskelik saılaý komıssııalarynyń tóraǵalary qatysty. 28 maýsym kúni barlyq óńirdegi sekildi, Batys Qazaqstanda da oblystyq máslıhat sessııasy ótip, saılanǵan depýtattyń esimi belgili bolady», - dedi Ǵaısa Qapaqov.
