BQO-dan Reseı qalalaryna avtobýstar qaıtadan qatynaı bastady
BQO jolaýshylar kóligi jáne avtomobıl joldary basqarmasy basshysynyń orynbasary Tımýr Shınııazovtyń óńirlik kommýnıkatsııalar qyzmeti alańynda ótken brıfıngide málim etkenindeı, óńirde jeti halyqaralyq avtobýs baǵyty (Oral-Samara, Oral-Orynbor, Oral-Tolıattı, Oral-Saratov, Oral-Býzýlýk, Oral-Qazan, Aqsaı-Orynbor) bar.
Onyń sózine qaraǵanda, avtobýs qatynastary karantınge baılanysty toqtatylǵan bolatyn. 14 sáýirden bastap avtobýs Oral-Samara baǵytynda júre bastady. Búgin avtobýstar Tolıattı jáne Saratov baǵytynda jolǵa shyqty.
Sondaı-aq Atyraý men Aqtóbege de avtobýstar qatynaıdy. Alaıda kassa 1 sáýirden bastap ashylǵanymen, Aqtóbege bılet satyp alýshy jolaýshylar bolmaı otyr.
T.Shınızovtyń aıtýynsha, oblysishilik 21 baǵytta 12 tasymaldaýshy qyzmet kórsetedi. 12 aýdannyń 11-i avtobýspen qamtylǵan. Kúni búgin Oral-Jympıty baǵytynda ǵana tasymaldaýshy joq, ol aldaǵy konkýrsta anyqtalady.
2021 jylǵy konkýrstardyń qorytyndysy boıynsha jańadan 9 aýdanaralyq avtobýs baǵyty ashyldy.
«Sońǵy jyldary oblystyq bıýdjetten bólinetin sýbsıdııa kólemi artyp keledi. 2021 jyly respýblıkalyq bıýdjetten berilgen 176,1 mln teńge sýbventsııanyń 175,4 mln teńgesi ıgerildi. 140 572 jolaýshy tasymaldandy. Bıylǵa 365 mln teńge qaraldy. Kúni búgin 7 tasymaldaýshy 11 baǵyt boıynsha sýbsıdııa alyp otyr», dedi T.Shınııazov.
Sol sekildi Oral qalasynyń bıýdjetinen tasymaldaýshylardy sýbsıdııalaýǵa jyl basynda 414 mln teńge bólindi, bıylǵy sáýirde shyǵyndardy jabý úshin qosymsha 800 mln teńge qarastyrý josparlanýda.