BQO-dan qozy eti Iranǵa eksporttaldy
ORAL. QazAqparat - Aqjaıyq aýdanynda ornalasqan «BatysMarkaLamb» JShS-dan tońazytylǵan qozy etiniń alǵashqy ónimi Iranǵa jóneltildi, dep habarlaıdy «QazAqparat» tilshisi.
Kásiporyn aktsıonerleriniń biri Rahymjan Ismaǵulovtyń aıtýynsha, bastapqy ónim retinde 18 tonna tońazytylǵan qozy eti daıyndalǵan. Eki júk kóligi qozy etin Aqtaýdaǵy halyqaralyq áýejaıǵa jetkizip úlgerdi, ony ári qaraı ushaqpen ırandyq áriptester alyp ketti. Irandyq áriptestermen barlyǵy 1,5 myń tonna qozy etin jóneltýge kelisimshartqa qol qoıylǵan. 
Irandyq «Sanaıe» kompanııasy aptasyna úsh ret osyndaı ónimdi qabyldaýǵa daıyn. Kompanııa ókili Hadı Hadad Zadeniń sózine qaraǵanda, Iranda qozy eti erekshe suranysqa ıe. Ásirese, sapasy men dámi jaǵynan qazaqstandyq ónim joǵary baǵalanady. Sondyqtan «BatysMarkaLamb» JShS-men kelisimshart ta uzaq merzimge jasalǵan.
Batys Qazaqstan oblysynyń ákimi Altaı Kólginovtiń málim etkenindeı, bul kelisimge batysqazaqstandyq delegatsııanyń Iranǵa ótken jylǵy sapary kezinde qol jetkizilgen bolatyn.
Elbasynyń Iranǵa saparynan keıin eki eldiń arasynda jaqsy qarym-qatynas ornaǵany belgili. Atalmysh sapardyń nátıjesinde qos birdeı mańyzdy joba qolǵa alyndy. Sonyń biri birlesken munaıhımııa kásipornyn ashý bolsa, ekinshisi - qozy etin eksporttaý. Bul óńirdegi sharýa qojalyqtaryna da tıimdi. Sonymen qatar «BatysMarkaLamb» JShS qozy etin kórshiles aımaqtardan da qabyldaı alady.
