BQO-dan ıhtıozavrlardyń eń kóne túri tabyldy
ORAL. QazAqparat - Batys Qazaqstan oblysynan ıhtıozavrlardyń eń kóne túri tabyldy, dep habarlaıdy «QazAqparat» tilshisi.
Zelenov aýdandyq jas týrıster stansasynyń jas geologtary tapqan biregeı oljany zertteý maqsatynda Oralǵa kelgen reseılik ǵalym, geologııa-mıneralogııa ǵylymdarynyń kandıdaty, Búkilreseılik palentologııa qoǵamy Ýlıanov bólimshesiniń tóraǵasy Vladımır Efımovtiń málim etkenindeı, bul - Qazaqstannan tabylǵan, mezozoı dáýirine jatatyn biregeı olja, eń kóne ıhtıozavr, ol sýdy mekendegen barlyq dınozavrlardyń túpatasy bolyp sanalady.
Buryn esh jerde kezdespegen, ǵylymda sıpattalmaǵan tirshiliktiń jańa túri. Sondyqtan oǵan Zelenov aýdany jas geologtarynyń ótinishi boıynsha jańa ataý beriledi. Uzyndyǵy 6-7 metrge jetetin bul janýar jyrtqysh bolǵan. Bas súıegi bir metrden assa, eskekaıaqtary eki metrdeı, keýdesiniń dıametri - 1 metr. Ol negizinen balyqtarmen jáne teńiz ulýlarymen qorektengen óte iri janýar bolǵan. Ihtıozavrlardyń kózi de úlken, 20 santımetrge deıin jetken. Sol jerlerden arheologııalyq qazbalar júrgizse, budan basqa da qyzyqty oljalar tabýǵa bolady. Túptep kelgende, Oralda iri palentologııalyq mýzeı ashý kózdelýde.
Aıta keteıik, zelenovtyq jas geologtar ıhtıozavrdyń súıekterin Olga Sýbbotınanyń jetekshiligimen 2016 jylǵy ekspedıtsııa barysynda sáýir aıynda tapqan. Sodan soń úıirme músheleri sol jyly Bórli aýdany Aqbulaq aýylynda ótken jas geologtardyń oblystyq sletinde ǵylymı zertteýlerin qorǵap, birinshi orynǵa ıe boldy. Keıin Býrabaıda TMD jas geologtary bas qosqan olımpıadada qazaqstandyq delegatsııa ákelgen dınozavr súıekteri qatysýshylardyń nazaryn aýdardy.
BQO balalar-jasóspirimder týrızmi jáne ekologııa ortalyǵynyń dırektory, pedagogıka ǵylymdarynyń kandıdaty Vıktor Fomınniń aıtýynsha, Batys Qazaqstanda ıhtıozavrlardy zertteıtin ǵalym joq. Sondyqtan dınozavrlardyń kóptegen túrin tapqan osy salanyń bilgir mamany Vladımır Efımovqa sarapshy bolýǵa usynys jasaldy. Ol atalmysh ıhtıozavr budan buryn tabylǵandardan 5 mln jyl buryn (ıaǵnı 150 mln emes, 155 mln jyl buryn) ómir súrgen dep otyr. Sonymen qatar ǵalym atalǵan jerdi áli de zertteı túsýge keńes berdi.
«Zelenov aýdany Krasnov aýyldyq okrýginde palentologııalyq qoryq ashý jumystary júrgiziletin bolady. Aldymen shekarasy anyqtalyp, sodan keıin qazba jumystary jalǵasady. Ihtıozavrlardyń basqa da túrleri tabylyp qalýy ábden yqtımal», dedi «QazAqparat» tilshisine V.Fomın.
