BQO-daǵy jol apatynan qurban bolǵandar sany tórteýge jetti
ORAL. QazAqparat - Keshe Oral-Atyraý jolynyń 98-shaqyrymynda bolǵan jol apatynan taǵy bir adam kóz jumdy, dep habarlaıdy «QazAqparat» tilshisi.
Aqjaıyq aýdandyq aýrýhanasynyń dırektory Darhan Haırýshevtiń aıtýynsha, keshe aýrýhanaǵa jetkizilgen 1962 jylǵy áıel adam da qaıtys boldy. Al júkti áıel oblystyq perınataldyq ortalyqqa jóneltildi. Qalǵan eki er adamnyń jaǵdaıy aýyr.
Oblystyq perınataldyq ortalyq dırektory Nıkolaı Dmıtrıenkonyń sózine qaraǵanda, ekiqabat áıeldiń de jaǵdaıy aýyr.
Eske sala keteıik, keshe Býdarın aýyldyq okrýgi Samal eldi mekeni tusynda eki jeńil avtokólik soqtyǵysyp, jasy 40-50-lerdegi eki áıel adam oqıǵa ornynda qaza tapqan bolatyn. Aýdandyq aýrýhanaǵa jetkizilgen bes kisiniń bireýi (50 jastan asqan er adam) keıin kóz jumǵan edi.
