BQO-daǵy jol apaty: eki adam kóz jumdy, úsh jasar bala aýyr halde
ORAL. QazAqparat - Batys Qazaqstan oblysynda jol apatynan eki adam qaza tapty, dep habarlaıdy QazAqparat tilshisi.
Keshe saǵat 10.00 shamasynda Chapaev-Jańaqala kúre joly boıynda «GAZel» jáne «ÝAZ Patrıot» avtokólikteri soqtyǵysty.
Oblystyq densaýlyq saqtaý basqarmasynyń baspasóz hatshysy Aınagúl Saqposynovanyń aıtýynsha, oqıǵa saldarynan eki adam qaza tapty. Úsh adam jaraqat alǵan, sonyń bireýi - bala.
Zardap shekkender Aqjaıyq aýdandyq aýrýhanasyna jetkizildi. 1974 jylǵy er adam dárigerler qaraǵannan keıin ambýlatorlyq emdeýge úıine jiberildi.1995 jylǵy jigit aýrýhanaǵa jatqyzyldy. Ol ortasha aýyr dárejede jaraqat alǵan.
Balanyń jaǵdaıyn bilý úshin quramynda balalar neırohırýrgi, hırýrg jáne reanımatolog bar sanavıatsııa ushyp bardy. Qaraǵannan keıin ony oblystyq kópbeıindi balalar aýrýhanasyna jetkizgen jón dep tabyldy. 2015 jylǵy bala osy aýrýhananyń hırýrgııa bóliminde aýyr jaǵdaıda jatyr, degenmen esi bar, sóılese alady.
Oqıǵa kýágerleriniń sózine qaraǵanda, qaza bolǵandar: 1958 jylǵy áıel adam men 1999 jylǵy jigit. Olar Oral qalasynyń turǵyndary kórinedi. Qazirgi kezde oqıǵanyń jaı-japsary anyqtalyp jatyr.
