BQO-daǵy tikushaq apaty boıynsha tergeý jalǵasyp jatyr - TJM

ASTANA. QazAqparat – Tótenshe jaǵdaılar mınıstrliginiń Batys Qazaqstan oblysyndaǵy bólimsheleri oqıǵa ornynda jumys isteıtin komıssııa músheleri úshin jyljymaly jylytý pýnktin uıymdastyrdy, dep habarlaıdy QazAqparat vedomstvonyń baspasóz qyzmetine silteme jasap.

Sondaı-aq, komıssııa múshelerin oqıǵa ornyna jetkizý úshin Batys Qazaqstan oblysy TJD-niń «Trekol» avtomobıli jumyldyryldy. Tikushaqtyń synyqtary men bólikterin saqtaýǵa arnalǵan qoımalar jáne angarlar izdeý, olardy júk avtotehnıkasy men krandardy tarta otyryp jetkizýdi qamtamasyz etý máseleleri pysyqtaldy.

Oqıǵanyń mán-jaıyn tergeýmen Indýstrııa jáne ınfraqurylymdyq damý mınıstrliginiń Kóliktegi oqıǵalar men ıntsıdentterdi tergeý departamentiniń qyzmetkerleri jáne ІІM Kóliktegi polıtsııa departamentiniń qyzmetkerleri aınalysyp jatyr. Sondaı-aq, tikushaqty shyǵarǵan zaýyt ókilderi de jumyldyrylǵan.