BQO-daǵy Terekti aýdandyq emhanasynyń ǵımaraty da, jabdyǵy da tozǵan – Senat depýtatynyń sapary
Senator Lázzat Rysbekova Batys Qazaqstan oblysynyń turǵyndarymen, densaýlyq saqtaý salasynyń qyzmetkerlerimen jáne oblystyq máslıhat depýtattarymen kezdesti.
Depýtat Terekti aýdanyndaǵy jumys istep turǵan aýdandyq emhananyń jaǵdaıymen tanysty. Ondaǵy jabdyqtar túgelimen 100%-ǵa tozǵany, al ǵımarattyń ózi 50-jyldary salynǵan jáne qazir jóndeý men jańartýdy qajet etetini týraly habardar boldy. Senator medıtsınalyq mekemeniń jańa ǵımaratyn salýǵa qarajat bólý máselesin respýblıkalyq deńgeıde kóterý jóninde nıeti bar ekenin atap ótti.
«Qalyptasqan jaǵdaıdy eskere otyryp, jańa áleýmettik nysandar qurylysyn salý jáne respýblıkalyq bıýdjetten nysanaly transfert túrinde qarjylandyrý máselelerin sheshýge járdemdesý qajet», - dep atap ótti Lázzat Rysbekova.
Al, oblystyq máslıhat depýtattarymen kezdesýde arnaıy áleýmettik qyzmetter kórsetý mekemesine jańa ǵımarat, Terekti jáne Báıterek aýdandarynda birkelki órt sóndirý depolaryn salý máseleleri talqylandy. Kezekte turǵandardy turǵyn úımen qamtamasyz etýge qatysty máseleler de sóz boldy.
Lázzat Rysbekova oblys ákimi Narıman Tóreǵalıevpen kezdesý barysynda jergilikti turǵyndardyń áleýmettik ál-aýqatyna qatysty máselelerdi sheshýge erekshe nazar aýdardy.