BQO-daǵy tártiptik keńes eki birdeı laýazymdy qyzmetkerdi jumysynan bosatý jóninde usynys jasady
ORAL. 16 qyrkúıek. QazAqparat /Eljan Eraly/ - QR Memlekettik qyzmet isteri agenttigi BQO-daǵy tártiptik keńesi 16 qyrkúıek kúngi otyrysynda bes birdeı memlekettik qyzmetkerdiń tártiptik isterin qarady.
Aldymen Oral qalasy prokýratýrasynyń usynysyna sáıkes BQO boıynsha baqylaý jáne áleýmettik qorǵaý departamentiniń dırektory Berikbolat Nurjanovtyń máselesi talqyǵa tústi. Tekserý nátıjesinde belgili bolǵanyndaı, quramynda departamenttiń bólim bastyǵy J.Imanqulova, bas mamandary G.Ómirzaqova men M.Qusaıynova bar komıssııa azamatsha S.Nurýlınanyń úshinshi toptyq múgedektigin alyp tastaǵan. Sarap qorytyndysymen kelispegen S.Nurýlına sotqa shaǵymdanyp, óziniń múgedektigin qalpyna keltirgen. Osyǵan baılanysty departament dırektory atalǵan úsh qyzmetkerge tártiptik jaza qoldanǵanymen, 1,5 aı jarym ýaqyt ótkennen keıin QR Memlekettik qyzmet isteri agenttigi basqarmasymen kelispesten, ony esepten merziminen buryn alyp tastaǵan. Sol sebepti B.Nurjanovqa Ar-namys kodeksine sáıkes sógis berý jóninde usynys jasaldy.
BQO boıynsha ekonomıkalyq qylmysqa jáne sybaılas jemqorlyqqa qarsy kúres departamenti Zelenov aýdanyna qarasty Makarov aýyldyq okrýginiń ákimi Vıacheslav Qamashevtiń isin tártiptik keńeske usyndy. Tergeýaldy tekseris aýyl ákiminiń óz ulyn júrgizýshi retinde jumysqa alyp, bıylǵy 1 aqpan men 30 maýsym aralyǵynda oǵan jalaqy tólegendigin anyqtady. Shyn mánisinde ol bul jumysty atqarmaǵan ári qyzmettik avtokólik ótken jyldyń jeltoqsanynan beri synǵan kúıinde qozǵalmaǵan. Sybaılas jemqorlyqqa jaǵdaı jasaıtyn quqyqbuzýshylyqqa barǵany úshin V.Qamashevti qyzmetinen bosatý usynyldy.
BQO mamandandyrylǵan tabıǵat qorǵaý prokýratýrasy ıAnvartsev orman jáne janýarlar dúnıesin qorǵaý jónindegi memlekettik mekeme dırektorynyń orynbasary Artýr Jumaǵazıevtiń qyzmetinen zańbuzýshylyq tapqan. Atap aıtqanda, erekshe qorǵalatyn tabıǵı aýmaqta tártip buzǵan azamattar tıisti ákimshilik jazaǵa tartylmaǵan. Sóıtip olarǵa zańsyz artyqshylyq kórsetilgen. Sondyqtan A.Jumaǵazıevti de qyzmetinen bosatý týraly usynys berildi.
Azamattardyń aryz-shaǵymdaryna ýaqtyly jaýap berý - memlekettik qyzmetkerler úshin óte mańyzdy másele. Buǵan ýaq-túıek jaıt retinde qaraýǵa bolmaıdy. Óıtkeni «Jeke jáne zańdy tulǵalardyń ótinishterin qaraý týraly» arnaıy zań bar, onyń babyna ilikseń, tártiptik keńestiń aldyna kelesiń. QR Memlekettik qyzmet isteri agenttigi BQO boıynsha basqarmasy Qaztalov aýdanynda tekserý júrgizgen kezde birqatar kemshilikterdiń betin ashty. Soǵan baılanysty aýdandyq ishki saıasat bóliminiń bastyǵy Qadyrbek Muqanov pen jer qatynastary bóliminiń bastyǵy Rollan Sarbópınge Ar-namys kodeksine sáıkes eskertý beriletin boldy.
