BQO-daǵy sybaılas jemqorlyqpen kúreste nátıje bar
ORAL. QazAqparat - Elimizde sybaılas jemqorlyqpen kúres saıasaty óz jemisin berip keledi. Bul týraly Dostyq úıinde atalmysh indetpen kúres pen onyń aldyn alý máselelerine arnalǵan semınarda aıtyldy, dep habarlaıdy «QazAqparat» tilshisi.
QR Memlekettik qyzmet isteri jáne sybaılas jemqorlyqqa qarsy is-qımyl agenttiginiń BQO boıynsha departamenti men Qazaqstan halqy BQO assambleıasy arasynda bıylǵy sáýir aıynda ózara áriptestik týraly memorandýmǵa qol qoıylyp, birlesken is-sharalar jospary bekitilgen bolatyn. Soǵan sáıkes uıymdastyrylǵan semınarda oblystyq assambleıa tóraǵasynyń orynbasary, hatshylyq meńgerýshisi Ǵaısa Qapaqov sybaılas jemqorlyqqa qarsy mádenıetti birlese otyryp, qalyptastyrý qajettigin atap ótti.
QR Memlekettik qyzmet isteri jáne sybaılas jemqorlyqqa qarsy is-qımyl agenttigi BQO boıynsha departamentiniń basqarma basshysy Birjan Haırýllınniń málim etkenindeı, sońǵy eki jylda Qazaqstanda jemqorlyq deńgeıin tómendetý baǵytynda aıtarlyqtaı jumystar atqaryldy. Bul eń aldymen 2015-2025 jyldarǵa arnalǵan sybaılas jemqorlyqqa qarsy kúres strategııasy men «100 naqty qadam» Ult josparyna negizdelgen sybaılas jemqorlyqqa qarsy kúres saıasatynyń júrgizilýine baılanysty. Soǵan sáıkes 2015 jyldyń ózinde jemqorlyq kórinisterin boldyrmaýǵa baǵyttalǵan alpystan asa zań qabyldandy. Ótken jyldan bastap memlekettik qyzmet jańa qalypqa kóshti. Sonyń nátıjesinde memlekettik qyzmetke qaıtyp kelýshilerdiń sany úsh ese artsa, kadrlardyń almasýy eki, basqa jumysqa aýysý on segiz ese azaıdy. Ákimshilik jáne quqyq qorǵaý qyzmetteriniń standarttaryn jaqyndatý boıynsha eleýli jumystar jasaldy. Ótken jyldyń jeltoqsanynan beri quqyq qorǵaý organdaryna jumysqa turýǵa úmitkerler áýeli agenttikte irikteýden ótýde. Іrikteý barysynda olar testileýge qatysady, sondaı-aq bolashaq qyzmetkerdiń jeke qasıetteri de eskerilip, baǵalanady.
Sybaılas jemqorlyq deńgeıiniń tómendegenin áleýmettik saýalnamalar da kórsetip otyr. Budan úsh jylǵy nátıjelermen salystyrǵanda, sybaılas jemqorlyqpen kúreste alǵa basýshylyqty baıqaǵan azamattardyń úlesi eki esege artsa, para berýshiler sany tórtten birge qysqardy. «Atameken» Ulttyq kásipkerler palatasynyń tapsyrysy boıynsha júrgizilgen «Іskerlik ahýaly - 2016» zertteýi de oń nátıje kórsetti. Mysaly, saýalnamaǵa qatysqan kásipkerlerdiń 70 paıyzdan astamy elimizdegi sybaılas jemqorlyqqa qarsy baǵdarlamany oń baǵalaǵan. Olardyń pikirinshe, jemqorlyq deńgeıin tómendetý úshin jazany qatańdatý, memlekettik qyzmetti tolyq avtomattandyrýǵa kóshirip, memlekettik qyzmetshilerge qarjylyq baqylaý sharalaryn kúsheıtý kerek. Sonymen qatar sybaılas jemqorlyqpen kúreste kóp nárse kúlli qoǵamnyń belsene aralasýyna baılanysty. Sondyqtan qazirgi tańda parany bermeý jáne almaý jónindegi túsinik-qaǵıdany qoǵamdyq sanaǵa jappaı engizýge umtylys jasalýda. Bul rette azamattyq qoǵamnyń yqpaly erekshe ról atqarady. Aıtalyq, ótken jyldan beri úkimettik emes uıymdarmen birge «Azamattyq baqylaý» jáne 40 myń uıym men 60 myńdaı adamnyń basyn biriktirgen «Ashyq kelisim» jobalary júzege asyrylýda. Osy oraıda jastarmen jumys umyt qalmaq emes. Agenttik bastamasymen oqýshylardyń tárbıe jumystary týraly tujyrymdama bekitildi. Osyǵan oraı el mektepteriniń toqsan paıyzynda «Adal urpaq» eriktiler klýby qurylyp, 750 myńdaı oqýshy múshelikke tartyldy. Joǵary oqý oryndarynda da osyndaı jumystar júrgizilýde.
Jıynda sóz alǵan «Nur Otan» partııasy oblystyq fılıaly tóraǵasynyń birinshi orynbasary Serik Súleımen sybaılas jemqorlyqqa barǵan 11, bıyl 3 adamnyń partııa qatarynan shyǵarylǵanyn jetkizdi.
Semınarda sybaılas jemqorlyqtyń aldyn alýǵa, tıisti zańnamalardy túsindirýge baǵyttalǵan osyndaı sharalardy jıi ótkizý qajettigi aıtyldy.
