BQO-daǵy sý tasqynynyń zardaptaryn joıý úshin bólingen resýrstardyń paıdaǵa asyrylýy qoǵam úshin ashyq bolýy tıis - K.Másimov
ORAL. 18 mamyr. QazAqparat /Qanat Qulshymanov/ - Batys Qazaqstan oblysyndaǵy sý tasqynynyń zardaptaryn joıý úshin bólingen resýrstardyń paıdaǵa asyrylýy qoǵam úshin ashyq bolýy tıis. Bul týraly QR Premer-Mınıstri Kárim Másimov búgin Oral qalasynda kóshpeli keńes barysynda málimdedi.
«Ulttyq kompanııalar men respýblıkalyq bıýdjetten bólingen bul qarajat qandaı da bir suraqtar týyndamaýy úshin qoǵam úshin ashyq bolýy tıis», - dedi K.Másimov.
«Ómirzaq Estaıuly (Shókeev), barlyq úıler tapsyrylyp, adamdar ol úılerge kóship almaıynsha bul máseleni baqylaýda ustaý qajet», - dep tapsyrma berdi Premer-Mınıstr óziniń birinshi orynbasaryna.
Keńes barysynda osyǵan deıin Ó.Shókeev habarlaǵandaı, naqtylanǵan málimetter boıynsha, qazirgi kúni sý tasqynynyń zardaptaryn joıý úshin 17 mlrd. 372,8 mln. teńge qajet. Qarjylandyrý respýblıkalyq bıýdjettiń rezervinen, sonymen qatar ulttyq kompanııalardyń, Astana men Almaty qalalary, oblystardyń ákimderi kórsetip jatqan materıaldyq kómek esebinen júzege asyrylýda.
Ó.Shókeevtiń aıtýynsha, ulttyq kompanııalar tarapynan 5 mlrd. teńge, ákimdikter tarapynan 1,5 mlrd. teńge bólindi. 2,9 mlrd. teńgeniń qosymsha demeýshilik kómegi tústi, onyń ishinde «QazMunaıGaz» - 900 mln. teńge, QTJ - 400 mln. teńge, «QazTransGaz» - 1 mlrd. teńge aýdardy.
Ó.Shókeev atap ótkendeı, oblystyń zardap shekken aýdandary men Oral qalasynda úıler men ınjenerlik jelilerdi salý jumystary bastaldy, merdigerler qurylys jumystaryn jańa oqý jyly bastalǵansha, al Oral qalasynda jylytý maýsymy bastalǵansha aıaqtaýǵa mindettenip otyr.
