BQO-daǵy Shalqar kólinde tórt adam qutqaryldy
ORAL. QazAqparat - Terekti aýdanyndaǵy Shalqar kólinde tórt adam qutqaryldy, onyń ekeýi - bala, dep habarlaıdy QazAqparat tilshisi.
BQO TJ departamentiniń baspasóz qyzmetinen túsken málimetke qaraǵanda, oqıǵa 9 shilde kúni oryn alǵan. Saǵat 17.05-te 112 telefonyna kólde jeldiń úrlemeli qaıyqta otyrǵan adamdardy belgisiz baǵytqa yǵystyryp ketkeni jóninde habar túsken.
Qutqarýshylar Asylbek Maıtanov pen Aslan Aldııarovtyń kásibı is-áreketteri arqasynda saǵat 17.45-te jaǵadan alty shaqyrymǵa uzap ketken 2008 jylǵy N.Mereeva, 2011 jylǵy N.Nurıman, 1986 jylǵy jylǵy A.Mereev pen S.Naýryzǵalı tabylyp, qutqaryldy. Olardyń jaǵdaıy birqalypty, medıtsınalyq kómekti qajetsinbedi.
Eske sala keteıik, budan buryn BQO-da er adamnyń balyq aýlaımyn dep júrip sýǵa ketkenin jáne jer qazý jumystary kezinde taǵy bir turǵynnyń máıiti tabylǵanyn jazǵan bolatynbyz.
