BQO-daǵy seksýaldyq sıpattaǵy qylmys: mektep dırektorynyń isi sotqa berildi
ORAL. QazAqparat – Batys Qazaqstan oblysynda seksýaldyq sıpattaǵy qylmysqa baılanysty mektep dırektorynyń isi sotqa berildi, dep habarlaıdy QazAqparat tilshisi.
QazAqparat budan buryn jazǵanyndaı, ógeı qyzyna seksýaldyq sıpattaǵy zorlyq-zombylyq áreketterin jasaǵan Jańaqala aýdanynyń turǵyny Jaqsybaı Sultanov 22 jylǵa sottalǵan bolatyn.
Sot sonymen qatar bilim berý mekemesi qyzmetkerleri men sharýa qojalyǵy basshysynyń jaýaptylyǵyn tekserý úshin BQO prokýratýrasy atyna jeke qaýly qabyldaǵan edi.
Qyz bala Jańaqala mektep-gımnazııasynda oqyǵan. Mektep-gımnazııa dırektory Larısa Qojahmetovaǵa QR QK 434-babyna (qylmys týraly habarlamaý) sáıkes aıyp taǵylyp otyr.
Jańaqala aýdandyq bilim berý bóliminen túsken málimetke qaraǵanda, aýdandyq sottyń qaýlysyna sáıkes tergeý amaldary júrgizilýine baılanysty L.Qojahmetova bıylǵy 25 naýryzda qyzmetinen shettetildi.
BQO sotynyń baspasóz qyzmeti istiń sotqa túskenin, búgin aldyn ala sot tyńdaýy bolatynyn jetkizdi.
