BQO-daǵy muǵalimderdiń tamyz keńesinde úzdikter marapattaldy
ORAL. QazAqparat - Búgin oblystyq qazaq drama teatrynda «Qazaqstannyń jańǵyrýy 3.0 - bilimniń úlesi» degen taqyrypta ustazdardyń dástúrli tamyz keńesi bolyp, onda sala qyzmetkerleri aldynda turǵan basty maqsat-mindetter jóninde aıtyldy, dep habarlaıdy «QazAqparat» tilshisi.
Keńeske qatysqan oblys ákimi Altaı Kólginovtiń atap ótkenindeı, Elbasy tapsyrmasyna sáıkes memleket tarapynan bilim berý salasyna udaıy kóńil bólinip keledi. Qazaqstandaǵy jańarý úrdisterine sáıkes qazirgi tańda mektepterde IT-tehnologııasyn qoldaný da erekshe mańyzǵa ıe bolyp otyr.
Mysaly, oblystaǵy 133 mektep robot tehnologııasymen qamtylsa, 92 bilim oshaǵy «Kúndelik» júıesine qosylyp, jýrnaldar elektrondy túrde toltyrylýda. Salaǵa bólinip jatqan qomaqty qarjynyń qaıtarymy bolýy kerek. Óńirde toǵyz birdeı bilim oshaǵy salynyp jatsa, sonyń tórteýi «Nurly jol» baǵdarlamasyna sáıkes boı kóterýde. Sońǵy jyldary aýyldan qalaǵa kóship kelýshiler sany kóbeıgeni belgili. Soǵan sáıkes Oral qalasynda da jańadan mektepter turǵyzylýda.
Sonymen qatar aýyldaǵy bilim oshaqtaryn da umytýǵa bolmaıdy. ıAǵnı aýyl mektepterin qaladaǵymen teńestirý baǵytynda olardy keń jolaqty ǵalamtorǵa qosý, ozyq tehnologııalardy engizý sııaqty jumystar jalǵasady. Memleket basshysynyń «Bolashaqqa baǵdar: rýhanı jańǵyrý» atty baǵdarlamalyq maqalasynda aıtylǵanyndaı, óskeleń urpaqtyń óz ólkesiniń ótkeni men búginin bilip ósýi, olardyń týǵan jeri men eline degen súıispenshiligin arttyrý baǵytynda da kóptegen ister atqarylýy tıis.
Keńes otyrysyna sondaı-aq QR Bilim jáne ǵylym mınıstrliginiń ókili, zań qyzmeti jáne halyqaralyq yntymaqtastyq departamentiniń dırektory Nurseıit Baıjanov qatysyp, jańartylǵan bilim mazmunyn engizýge baılanysty alda turǵan mindetter jóninde áńgimelep berdi.
Jıyn barysynda oblystyq baıqaýdyń qorytyndysy nátıjesinde «Orta bilim beretin úzdik uıym» atanǵan Bórli aýdany ortalyǵy Aqsaı qalasyndaǵy №4 orta mektepke qarjylaı syılyq berildi. Respýblıkalyq «Úzdik pedagog» baıqaýynyń oblystyq kezeńiniń jeńimpazdary, №34 «Balbulaq» bóbekjaıynyń tárbıeshisi A.Saǵıdýllına, oblystyq daryndy balalarǵa arnalǵan mamandandyrylǵan «Bilim-ınnovatsııa» mektep-lıtseıiniń geogrofııa pániniń muǵalimi A.Sıdarova, Oral aqparattyq tehnologııalar kolledji alǵashqy áskerı daıyndyq pániniń oqytýshysy M.Aqqalıev arnaıy syılyqtarmen marapattaldy. Sonymen qatar bir top sala qyzmetkerlerine QR Bilim jáne ǵylym mınıstrliginiń «Y.Altynsarın», «Bilim berý isiniń qurmetti qyzmetkeri» tósbelgileri de tabys etildi.
