BQO-daǵy boran kezinde 39 adam qutqaryldy
ASTANA. QazAqparat - Naýryz aıy aıaǵyna taıasa da Oral óńirinde kóktemniń lebi seziler emes. Kerisinshe kún saıyn tabıǵat tosyn minez tanytýda, dep habarlaıdy Habar 24.
Munda boran men kóktaıǵaqqa baılanysty óńirde barlyq baǵyttaǵy joldar jabylsa, keshe Oral-Tasqala men Reseı shekarasyna deıingi kúre jolda kólik qatynasyna shekteý qoıyldy. Aqtútek boranda qar qursaýynda qalǵan 25 jeńil jáne júk kólikteri shyǵarylǵan. Tótenshe jaǵdaı qyzmetiniń mamandary 39 jolaýshyny qaýipsiz jerge jetkizgen. Sınoptıkter búgin túnde de tuman túsip, kóktaıǵaq bolady, keı jerlerde boran soǵady degen boljam jasap otyr. «Oraldan Tasqalaǵa odan ári Saratovqa aparar joldaǵy kólik qozǵalysy tańmen qalpyna keltirildi. Al Tasqaladan Aqqýraı arqyly Bolashaqqa barar joldy keshke qaraı ashýdy kózdep otyrmyz. Sebebi ol jaqta kúndiz boran boldy. Qazir joldardy tazalaý jumystary júrip jatyr», - deıdi oblystyq TJD bólim bastyǵy Baqytjan Ihsanov.
