BQO-daǵy aýylda tabıǵı sıpattaǵy tótenshe jaǵdaı jarııalandy

ORAL. QazAqparat – Batys Qazaqstan oblysy Tasqala aýdany ortalyǵy Tasqala aýylynda tabıǵı sıpattaǵy tótenshe jaǵdaı jarııalandy, dep habarlaıdy QazAqparat tilshisi.

BQO TJ departamentiniń baspasóz qyzmeti málim etkendeı, aýyldaǵy eki úıdegi 41 páterde áli jylý joq.

QazAqparat budan buryn jazǵanyndaı, elektr jaryǵynyń bolmaýynan Jeńis kóshesindegi úsh qabatty eki úıde jylytý júıesi qatyp qalǵan bolatyn.

Qazirgi kezde qalpyna keltirý jumystary jalǵasýda.

Turǵyndar úılerinde. Olarǵa jergilikti atqarýshy organ elektr jylytý quraldaryn alyp, generatorǵa qosý úshin jetkizip berdi.

Atalǵan úılerdi jylytý úshin BQO TJ departamenti tarapynan da tıisti jumystar jasalýda.

Oblysta 26 aqpan kúngi saǵat 20.00-degi málimet boıynsha eki aýdanda úsh eldi meken áli elektr jaryǵynsyz qalyp otyr.

Atap aıtqanda, Báıterek aýdanynda (Shalǵaıda – 22, Gremıachıı aýylynda 20 abonent), Qaztalovta (Sadovyıda 110 abonent) barlyǵy 152 abonent jaryqty paıdalana almaýda.

«Batys Qazaqstan elektr jelilerin taratý kompanııasy» AQ (20 qyzmetker, 4 tehnıka) qalpyna keltirý jumysyn júrgizýde.

Eske sala keteıik, budan buryn BQO-da jeti aýdanda 14 eldi mekenniń jaryqsyz qalǵanyn jazǵan bolatynbyz.