BQO-daǵy jylý magıstraldaryn rekonstrýktsııalaýǵa 4,9 mlrd teńge bólindi

ASTANA. KAZINFORM - Aldaǵy jylytý maýsymynyń úzilissiz ótýin qamtamasyz etý úshin QR Úkimetiniń rezervinen Batys Qazaqstan oblysynyń ákimdigine shamamen 4,9 mlrd teńge bólindi. Tıisti qaýlyǵa Premer-Mınıstr Oljas Bektenov qol qoıdy.  

Qarajat Oral qalasyndaǵy eki jylý magıstralin rekonstrýktsııalaýǵa bólinedi. Olar táýekeldiń «qyzyl aımaǵyndaǵy» 19 jylý kóziniń tizbesine kiredi.

Prezıdent Qasym-Jomart Toqaev Úkimetke olardy basym tártippen jańǵyrtýdy tapsyrǵan bolatyn. 

Premer-Mınıstr Oljas Bektenov bıylǵy aqpan aıynda óńirge jumys sapary barysynda ákimdikke kóp kidirmeı rekonstrýktsııalaýdy talap etetin jylýmen qamtý nysandary boıynsha qujattama daıyndaýdy tapsyrǵan bolatyn.

TM-5 jáne TM-2 jylý magıstraldary boıynsha jobalar daıyndaldy.

Oral qalasyndaǵy uzyndyǵy 1,6 shaqyrym bolatyn TM-5 jylý magıstrali 1987 jyly paıdalanýǵa berilgen, onyń tozýy - 80%.

Jóndeý jumystaryna 574 mln teńgege jýyq qarjy bólindi.

Ekinshi joba 4 shaqyrym TM-2 jylý magıstralin rekonstrýktsııalaýdy qamtıdy, onyń tozý deńgeıi – 75%.

Jobany 4,3 mlrd teńge kóleminde qarjylandyrý kózdelgen. Eki ýchaskede de kúrdeli jóndeý buryn sońdy júrgizilmegen.

Bólingen qarajat 106 kópqabatty úı men 20-ǵa jýyq áleýmettik nysandy, ıaǵnı 24 myń abonentti, balabaqshalar, mektepter, kolledjder, aýrýhanalar men emhanalardy úzdiksiz jylýmen qamtamasyz etýge múmkindik beredi.