BQO-daǵy ushqyshsyz apparat apaty: Qorǵanys mınıstrligi halyqty alańdamaýǵa shaqyrdy

ASTANA. KAZINFORM — Batys Qazaqstan oblysy aýmaǵynda ushqyshsyz ushatyn apparattyń ne sebepti qulaǵanyn anyqtaıtyn tergeý qorytyndysy boıynsha sheshim qabyldanady. Bul týraly Qorǵanys mınıstriniń orynbasary Shaıh-Hasan Jazyqbaev málim etti.

— BQO-daǵy ushqyshsyz ushatyn apparattyń qulaý faktisi boıynsha quzyretti organdar tergeý júrgizip jatyr. Tergeýden Qorǵanys mınıstrligi de tys qalǵan joq. Áýe qorǵanysy árqashan bizdiń qaraýymyzda. Tergeýdiń qorytyndysy boıynsha qajet bolsa, qosymsha is-shara qabyldaımyz. Múmkin tehnıkalyq aqaý bolyp, syrtqa shyǵyp ketken shyǵar, basqa da sebep bolýy múmkin. Tergeý aıaqtalǵansha, naqty aıta almaımyz, — dedi Shaıh-Hasan Jazyqbaev Májilis qabyrǵasynda BAQ ókilderiniń saýalyna jaýap bere turyp.

Osy oraıda mınıstrdiń orynbasary halyqty alańdamaýǵa shaqyryp, jaǵdaıdyń baqylaýda ekenin aıtyp sendirdi.

— Ushqyshsyz ushatyn apparattyń naqty ne sebepti qulaǵanyn tergeý qorytyndysy boıynsha sheshim qabyldaımyz. Tergeýmen resmı quqyǵy bar organdar aınalysyp jatyr, Qorǵanys mınıstrligi de aınalysyp jatyr, — deıdi ol.

Buǵan deıin elimizdiń Syrtqy ister mınıstrligi BQO-daǵy ushqyshsyz apparat apatyna qatysty tergeý júrip jatqanyn málimdegen bolatyn. 

Eske sala ketsek, bıyl aqpanda BQO aýmaǵyna ushqyshsyz ushatyn apparatqa uqsas zat qulady. 

Keıin Batys Qazaqstan oblysynda ushqyshsyz ushatyn apparatqa uqsas zattyń tabylýyna baılanysty tekserý jumystary júrgizilip jatqany aıtyldy. 

25 naýryzda BQO-da taǵy bir ushqyshsyz ushatyn apparattyń bólshekteri tabyldy.