BQO-daǵy mektepte muǵalimder men qyzmetkerlerge 57 mln teńge artyq tólengen
Oral qalasyna qarasty Serebrıakov orta mektebinde muǵalimder men qyzmetkerlerge 57 mln teńge artyq tólengen, dep habarlaıdy Kazinform.
Oral qalasynyń bilim berý bóliminen túsken málimetke qaraǵanda, qazirgi ýaqytta 73 qyzmetkerge, onyń ishinde 39 muǵalimge 57,1 mln teńge kóleminde negizsiz aýdarylǵan qarajatty bıýdjetke qaıtarý boıynsha sotqa deıingi retteý rásimderi uıymdastyrylyp jatyr.
«Batys Qazaqstan oblysy boıynsha ekonomıkalyq tergep-tekserý departamentinen qylmystyq is qorytyndysy boıynsha is-qujattaryn tártipke keltirip, qoldanystaǵy zańnama aıasynda tıisti sharalar qabyldaý boıynsha uıǵarym BQO bilim basqarmasyna berilgen. Sáıkesinshe atalǵan uıǵarym Oral qalasynyń bilim berý bólimine joldandy. Bıylǵy oqý jylynyń basynda Oral qalasy bilim berý bóliminiń basshysy Aqjarqyn Temirhanovanyń qatysýymen Serebrıakov mektebi ujymymen memlekettik aýdıt nátıjesinde anyqtalǵan bereshekter týraly túsindirme jumystary júrgizildi. Ujym tarapynan aýdıt qorytyndysyna kúdikter paıda bolǵandyqtan, táýelsiz aýdıt júrgizý arqyly ár qyzmetker boıynsha naqty bereshek somasyn eseptep shyǵarý týraly usynys berildi. Usynys qabyldanyp, táýelsiz aýdıt – «UHY SAPA Consulting» JShS-men kelisimshart jasaqtaldy. Qazirgi kezde 2021 jyldyń basynan 2022 jyldyń 31 qazanyna deıingi ýaqyt boıynsha aýdıtorlyq tekserý júrgizilýde. Qorytyndysy shyqqan soń mektep ujymymen jınalys ótkizilip, tolyq aqparat beriledi», - dep habarlady vedomstvodan.
Serebrıakov orta mektebi matematıka-fızıka pániniń muǵalimi Anargúl Qısmetovanyń aıtýynsha, qyzmetkerler ár túrli somada qaryzdar bolyp otyr.
«Serebrıakov mektebinde 2005 jyldan beri qyzmet etip kelemin. Mamyr aıynan beri osyndaı jaǵdaıǵa tap boldyq. Meniń aıtarym, aýdıttiń de, býhgalterlerdiń de esepteýleri ártúrli bolyp otyr. Mysaly, maǵan bastapqyda 2 mln 296,377 myń teńge kóleminde artyq tólengen dedi. Sońǵy habarlamada 1 mln 317 myń teńgege tústi. Al mektep býhgalteri sanaǵan kezde 1 mln 104 myń teńge bolyp shyqty. Qazirgi kezde táýelsiz aýdıt tekserý júrgizip jatyr. Muǵalimder men qyzmetkerler túrlishe, aldy 3 mln teńgege deıin qaryzdar bolyp otyr. Munymen kelispeı, sotqa deıin baramyz. Óıtkeni esepte naqtylyq joq. Qolymyzǵa kvıtantsııa berilmeıdi, qaryzdyń qaıdan qalyptasqanyn bilmeımiz. Aıtalyq, qalalyq bilim berý bóliminiń býhgalterlerine jalaqymdy eseptetken kezde de eki túrli bolyp shyqty, arasynda 40 myń teńgedeı aıyrmashylyq bar», - dedi A.Qısmetova.
«Men osy mektepte ótken jyldyń qyrkúıeginde rotatsııa tártibimen aýysyp keldim. Osyndaı jaǵdaı anyqtalǵannan keıin býhgalter birden qyzmetinen shettetildi. Muǵalimder men qyzmetkerlerdiń qaryzǵa kelispeı otyrǵany ras. Degenmen oqý protsesi qalypty júrip jatyr», - dedi mektep dırektory Nurjan Alpysbaev.
