BQO-daǵy Kırov sý qoımasynyń rekonstrýktsııasy aıaqtalýǵa jaqyn

ASTANA. KAZINFORM — Batys Qazaqstan oblysynyń Aqjaıyq aýdanynda 58 jyldan keıin alǵash ret qolǵa alynǵan Kırov sý qoımasyn kúrdeli rekonstrýktsııalaý jumystary aıaqtalýǵa jaqyn. Bul týraly Sý resýrstary jáne ırrıgatsııa mınıstrligi habarlady.

Joba aıasynda uzyndyǵy 8 shaqyrymnan asatyn «Kóshim» kanaly, uzyndyǵy 3 shaqyrymnan asatyn sý qoımasynyń bógeti, sondaı-aq Pervomaı, Býdarın jáne Kırov-Chıjın kanaldary jóndelip jatyr. Budan bólek, uzyndyǵy 2,2 shaqyrymnan asatyn eki elektr jelisi men 3,77 shaqyrymdyq syrtqy jaryqtandyrý júıesi salynyp, beınebaqylaý, avtomattandyrylǵan eskertý júıeleri men baqylaý-ótkizý pýnktteri ornatylǵan.

– Joba júzege asqan soń Kırov sý qoımasynyń beriktigi artyp, tutynýshylarǵa sýarmaly sý úzdiksiz beriledi. Rekonstrýktsııa nysannyń syıymdylyǵyn ulǵaıtyp, onyń fýnktsıonaldyq múmkindikterin jaqsartady. Nátıjesinde Batys Qazaqstan oblysynyń 12 myń gektardan astam egistik alqaptary sýmen qamtamasyz etiledi, – dedi Sý resýrstary jáne ırrıgatsııa mınıstri Nurjan Nurjigitov.

Kırov sý qoımasy 1967 jyly paıdalanýǵa berilgen, jalpy syıymdylyǵy – 62,9 mln tekshe metr. Bul nysan – Oral-Kóshim sýarý jáne sýlandyrý júıesiniń mańyzdy bóligi.

Aıta keteıik, Túrkistan oblysynda 11 myńǵa jýyq turǵyndy aýyzsýmen qamtamasyz etetin sý qoımasyn rekonstrýktsııalaý jumystary jaqynda aıaqtalady.