BQO-daǵy aýrýhanada lıft jumys istemeıdi: Naýqastarǵa qıyn bolyp tur
ORAL. KAZINFORM — Batys Qazaqstan oblysy Báıterek aýdany Darııan aýylyndaǵy 2-aýdandyq aýrýhanada lıftiniń jumys istemeıtini týraly áleýmettik jelide beınejazba jarııalandy.
Qoǵam belsendisi Almagúl Iqsanovanyń málim etkenindeı, naýqastar úshinshi qabattan túsý nemese qaıta shyǵý úshin baspaldaqty paıdalanýǵa májbúr bolýda.
- Bul jasy ulǵaıǵan, múgedektigi bar, sondaı-aq ota jasalǵan adamdarǵa óte qıyn. Júk lıftisi úsh jyl boıy jumys istemeıdi. Bıýdjetten qarjy bólingen. Merdigerdi tezirek anyqtap, jumysqa kirisý kerek. Aýrýhana barlyq adamdar úshin qoljetimdi bolýy tıis. Munda olar óz densaýlyǵyn synaý úshin emes, emdelý úshin keledi, - deıdi A.Iqsanova.
Osyǵan baılanysty Kazinform tilshisi BQO densaýlyq saqtaý basqarmasyna arnaıy saýal joldaǵan edi.
Basqarmadan túsken málimetke qaraǵanda, Báıterek aýdanyndaǵy 2-aýdandyq aýrýhanada júk lıftisin ornatýǵa baılanysty oblystyq máslıhattyń 2026 jylǵy 4 maýsymdaǵy № 25-1 sheshimi negizinde memlekettik satyp alý portalynda baǵa usynystaryn suratý tásilimen satyp alý júrgizilýde.
- Baǵa usynystary 2026 jylǵy 9-11 maýsym aralyǵynda qabyldanady. Satyp alý qorytyndysyna sáıkes aýrýhana úshin jańa júk lıftisi alynyp, ornatylatyn bolady, - delingen resmı jaýapta.
Eske sala keteıik, budan buryn BQO-da aýyldaǵy qoqys polıgonynan medıtsınalyq qaldyqtar tabylǵanyn jazǵan edik.
Sondaı-aq BQO-da tabylǵan medıtsınalyq qaldyqtardyń jaı-japsary belgili boldy.
