BQO-daǵy aýylda turǵyn úıdiń memleket esebinen sapasyz salynyp jatqany ras pa
ORAL. KAZINFORM — Batys Qazaqstan oblysy Aqjaıyq aýdany Taıpaq aýylynda turǵyn úıdiń memleket esebinen sapasyz salynyp jatqany jóninde áleýmettik jelide beınejazba jarııalandy.
Qoǵam belsendisi Almagúl Iqsanovanyń málim etkenindeı, Taıpaqta boı kóterip jatqan turǵyn úıdiń qabyrǵasy jup-juqa, kirpishtiń arasynan kóshe kórinip tur.
— Mundaı úıdi kim qabyldap alady? — deıdi A.Iqsanova.
Atalmysh máseleni Kazinform tilshisi Aqjaıyq aýdany ákimdiginen anyqtaǵan edi.
Ákimdikten túsken málimetke qaraǵanda, beınejazbada kórsetilgen turǵyn úı jergilikti atqarýshy organnyń bıýdjet qarajaty esebinen salynbaǵan jáne onyń tapsyrysy boıynsha turǵyzylmaǵan. Atalǵan turǵyn úı jeke tulǵanyń jeke menshigi sanalady.
2026 jyly Aqjaıyq aýdanynyń Taıpaq aýylynda halyqtyń áleýmettik osal toptaryna jatatyn azamattardy turǵyn úımen qamtamasyz etý maqsatynda turǵyn úıler satyp alý josparlanǵan.
Turǵyn úılerdi satyp alý Qazaqstan Respýblıkasynyń memlekettik satyp alý týraly zańnamasyna sáıkes memlekettik satyp alýdyń veb-portaly arqyly júzege asyrylady. Konkýrsqa óz qarajaty esebinen turǵyn úı salyp, tehnıkalyq erekshelik talaptaryna sáıkes keletin turǵyn úılerdiń menshik ıeleri ózderiniń baǵa usynystarymen qatysa alady.
Tehnıkalyq erekshelik talaptaryna sáıkes bir turǵyn úıdiń jalpy aýdany keminde 60 sharshy metr bolýy tıis.
— Turǵyn úıdiń qabyrǵalary keramzıt bloktan, ekobloktan nemese sılıkat kirpishten salynýy qajet. Eger turǵyn úı keramzıt bloktan nemese ekobloktan turǵyzylsa, onyń syrtqy qabyrǵalary mindetti túrde jylý oqshaýlaǵyshpen jáne kirpishpen qaptalýy tıis. Sonymen qatar turǵyn úı barlyq ınjenerlik-kommýnaldyq ınfraqurylym jelilerine tolyqtaı qosylǵan bolýy qajet, — delingen resmı jaýapta.
Eske sala keteıik, budan buryn Oralda turǵyndardyń káriz sýynyń jertólege quıylyp jatqanyn aıtyp shaǵymdanǵanyn jazǵan edik.
Sondaı-aq Oral turǵyndary jańbyr jaýǵan saıyn kósheniń sýǵa tolatynyn aıtty.
