BQO-daǵy aýylda qos birdeı saıabaqtyń kútimsiz qalǵany ras pa

Qoǵam belsendisi Almagúl Iqsanovanyń málim etkenindeı, burynǵy aýdan ortalyǵy Taıpaq aýylyndaǵy saıabaqtyń qaqpasy qulaıyn dep tur. Aramshóp ósip ketken, qarǵanyń ólimtigi jatyr. Eskertkish ábden tozǵan. Taǵy bir soraqysy, Halyq qaharmany Hıýaz Dospanova beınelengen bannerge qustar sańǵyp ketken.

- Eki saıabaqtyń da jaǵdaıy syn kótermeıdi. Qaqpasyn symmen baılap tastaǵan, kirý múmkin emes. Qaqpany syrlap, adamdar demalatyn oryndyqtar qoıyp, bannerdi jýýǵa bolady ǵoı, - deıdi A.Iqsanova. 

Osyǵan baılanysty Kazinform tilshisi Aqjaıyq aýdany ákimdigine arnaıy saýal joldaǵan edi. 

Ákimdiktiń málimetine qaraǵanda, № 1 saıabaq Ekinshi dúnıejúzilik soǵys ardagerlerine arnalǵan memorıaldyq nysan bolyp esepteledi. Negizgi kireberis qaqpa kelýshilerdiń qozǵalysyn shekteý maqsatynda emes, aýyl sharýashylyǵy janýarlarynyń saıabaq aýmaǵyna kirip ketýiniń aldyn alý úshin jabylǵan. Osyǵan baılanysty jaıaý júrginshilerge arnalǵan kireberis arqyly saıabaqqa kedergisiz kirýge múmkindik jasalǵan.

Saıabaqtyń sanıtarlyq jaǵdaıyn saqtaý jáne abattandyrylǵan aýmaqtyń tazalyǵyn qamtamasyz etý maqsatynda 2026 jyldyń sáýir-mamyr aılarynda senbilik jumystary uıymdastyrylyp, aýmaq qoqystan tazartyldy, shópteri shabylyp, aǵashtardy kútip-baptaý jumystary júrgizildi.

Aýdan ákimdiginiń málimdeýinshe, №2 saıabaq qazirgi ýaqytta ýaqytsha jabyq. Buǵan deıin aýyl turǵyndarynyń maldaryn saıabaq aýmaǵyna kirgizip jaıý derekteri birneshe ret tirkelgendikten, jasyl jelekterdi saqtaý maqsatynda demalys orny ýaqytsha jabylǵan.

Soǵan qaramastan, onyń sanıtarlyq jaǵdaıyn saqtaý boıynsha jyl saıyn senbilikter ótkizilip, aýmaqty shópten tazartý, aǵashtardy ákteý jáne sanıtarlyq kútip-ustaý jumystary turaqty túrde júrgizilýde.

Sonymen qatar № 2 saıabaq aýmaǵynda ornalasqan eski eskertkishti demontajdaý jumystary josparlanǵan. Sebebi atalǵan eskertkishtiń jańartylǵan úlgisi № 3 saıabaq aýmaǵyna ornatylǵan. Osyǵan baılanysty eski eskertkishti alyp tastaý jáne aýmaqty qaıta abattandyrý jumystary kezeń-kezeńimen júzege asyrylatyn bolady.

- Oǵan qosa Taıpaq aýylyndaǵy № 1, № 2, № 3, № 4 jáne № 5 saıabaqtarǵa qatysty sot sheshimine sáıkes atalǵan nysandar ıesiz múlik sanatynan shyǵaryldy. Qazirgi ýaqytta olardy kommýnaldyq menshikke qabyldaý jáne tıisti teńgerimge alý rásimderi Qazaqstan Respýblıkasynyń qoldanystaǵy zańnamasyna sáıkes júrgizilýde. Atalǵan rásimder aıaqtalǵannan keıin saıabaqtardy kútip ustaý, abattandyrý, jóndeý jáne damytý baǵytyndaǵy jumystar jergilikti bıýdjet qarajaty esebinen jasalady. Jarııalanymda kórsetilgen Hıýaz Dospanovanyń beınesi bar bannerdiń lastanýy boıynsha tıisti sharalar qabyldandy. Banner jýylyp, retke keltirildi. Jarııalanymda kóterilgen máseleler nazarǵa alynyp, anyqtalǵan kemshilikter boıynsha tıisti jumystar júrgizildi. Qalǵan máseleler zańnamaǵa sáıkes sheshiletin bolady, - delingen resmı jaýapta.

Eske sala keteıik, budan buryn Batys Qazaqstanda qos qabatty jataqhananyń qulaǵaly turǵany ras pa, sony jazǵan edik.