BQO-da jyljymaıtyn múlikti tirkemegenderge 44,7 mln jýyq teńge aıyppul salyndy
ORAL. QazAqparat - Batys Qazaqstan oblysynda ótken jyly jyljymaıtyn múlikti ýaqtyly tirkemegenderge 44,7 mln jýyq teńge aıyppul salyndy, dep habarlaıdy «QazAqparat» tilshisi.
BQO ádilet departamenti basshysynyń mindetin atqarýshy Hamıdolla Kýstavletovtiń óńirlik kommýnıkatsııalar qyzmeti alańynda málim etkenindeı, óńirde jyljymaıtyn múlikke quqyqtardy tirkeý qyzmetin uıymdastyrý boıynsha tıisti jumystar júrgizilip keledi. 2017 jyly 63170 (2016 jyly - 53115) jyljymaıtyn múlikke quqyqtar tirkelip, bıýdjetke 107,8 mln astam (2016 jyly - 88,1 mln astam) teńge baj salyǵy túsken.
Jyljymaıtyn múlikke quqyqtardy tirkeýge qajetti qujattar alty aı ishinde tirkelýi tıis. QR Ákimshilik quqyqbuzýshylyq kodeksi 460-babyna sáıkes 1978 is (2016 jyly - 617 is) qozǵalyp, 1971 adam (2016 jyly - 617) ákimshilik jaýapkershilikke tartyldy. Olardan 44,7 mln jýyq teńge (aldyńǵy jyly - 7,7 mln astam) aıyppul óndirildi.
Oblystaǵy advokattardyń jalpy sany 151-ge jetip, aldyńǵy jylǵydan 11-ge nemese 8 paıyzǵa kóbeıdi. Ádilet departamenti 89 advokatpen tegin zań kómegin kórsetý týraly shart jasady. «Advokattardyń zań kómegin kórsetýi» bıýdjettik baǵdarlamasy aıasynda tegin zań kómegin kórsetý úshin 41,848 mln teńge bólinip, ol tolyqtaı ıgerildi.
Óńirde sondaı-aq 72 jeke sot oryndaýshysy (2016 jyly - 53) jumys jasaıdy. 2017 jyly jeke sot oryndaýshylarynyń óndirisinde barlyǵy 95201 atqarý qujaty bolsa, sonyń 47893-i oryndaldy. Alıment óndirý boıynsha 6983 qujat bolsa, sonyń 1271-ine ǵana núkte qoıyldy.
Memleket paıdasyna 1,206 mlrd astam teńgeni óndirý jóninde 58289, 593 mln astam teńge ákimshilik aıyppuldy óndirý jóninde 36011 atqarý qujaty bolsa, 2017 jyly tıisinshe 605 mln astam teńgeni quraıtyn 31828 jáne 333 mln astam teńgeni quraıtyn 20734 atqarý qujaty oryndaldy.
Aıta keteıik, jeke sot oryndaýshylardyń qyzmetine baılanysty aryz-shaǵymnyń kóbeıýi alańdatady. 2016 jyly osyndaı 133 aryz tússe, ótken jyly ol 297-ge jetken. Sonyń ishinde 16 shaǵym rastalyp, jeke sot oryndaýshylary tártiptik jaýapkershilikke (2016 jyly - 8) tartyldy. Oǵan qosa prokýratýradan 3 usynys, sottardan 4 jeke uıǵarym túsip, qaraldy. Sonda jazalanǵan jeke sot oryndaýshylarynyń jalpy sany 21-ge jetti.
Brıfıngke sondaı-aq Oral qalalyq ádilet basqarmasynyń basshysy Estaı Rashqalıev te qatysty.
