BQO-da jylyna 4500-deı bala túrli jaraqatpen medıtsınalyq kómekke júginedi
ORAL. QazAqparat - Batys Qazaqstan oblysynda jyl saıyn orta eseppen 4500-deı bala túrli jaraqatpen medıtsınalyq kómekke júginedi. Bul týraly búgin Ortalyq kommýnıkatsııalar qyzmeti óńirlik fılıalynda BQO TJ departamenti bastyǵynyń orynbasary Aqylbek Ahmetjanov málim etti, dep habarlaıdy «QazAqparat» tilshisi.
Onyń aıtýynsha, balalar arasynda, ásirese, turmystyq jaraqattar jıi kezdesedi. Sonyń ishinde bıiktikten qulaıtyndar az emes. Mysaly, 2013 jyly 28 tamyzda Tasqala aýdanynda baǵanadan qulaǵan 2005 jylǵy bala kóz jumdy. 2013 jyl men 2017 jyldyń birinshi toqsany aralyǵynda terezeden qulaǵan (2013 jyly - 3, 2015 jyly - 1, 2016 jyly - 1, bıyl - joq) bes jasóspirimniń bári de qaza boldy. Sondaı-aq ashyq qudyqtarǵa qulaýdyń 16 deregi (2013 jyly - 2, 2014 - 5, 2015 jyly - 7, 2016 jyly - joq, bıyl - 1) tirkelgen. Bıyl 25 sáýirde Qaratóbe aýdany Úshana aýylynda qos búldirshin oınap júrip, septıkke túsip, batyp ketti.
Órt, gazdan ýlaný, sýǵa batýdan balalardyń qazaǵa ushyraý oqıǵalary az kezdespeıdi (2013 jyly - 3, 2014 jyly - 10, 2015 jyly - 13, 2016 jyly - 9). Oǵan qosa órt saldarynan 23 jasóspirim (2013 - 2, 2014 jyly - 10, 2015 jyly - 5, 2016 jyly - 6) túrli jaraqat aldy.
«Jaz shyǵa, balalardyń júris-turysy kóbeıip, sýǵa ketý qaýpi de artady. Sońǵy on jylda óńirde 321 adam sýǵa ketse, sonyń 78-i - balalar. Sonyń ishinde 2015 jyly 13, 2016 jyly 9 bala «tilsiz jaýdyń» qurbany boldy. Bıyl mundaı jaǵdaı kezdespegenimen, elimizde 40 adam, sonyń ishinde 20 bala sýǵa ketti. Bıyl Ońtústik Qazaqstan oblysynda sýǵa ketken 7 adamnyń beseýi, Almaty oblysynda jeteýdiń tórteýi bala bolyp otyr. Atyraý, Jambyl oblystarynda tórt adamnan sýǵa ketti. Sondyqtan balalardy sýǵa túsý merziminde qaraýsyz qaldyrmaý kerek», dedi A.Ahmetjanov.
