BQO-da jyl basynan beri myńnan astam oqýshydan koronavırýs anyqtaldy

ORAL. QazAqparat – Batys Qazaqstan oblysynda jyl basynan beri 1018 oqýshydan koronavırýs tabyldy, dep habarlaıdy QazAqparat tilshisi.

BQO densaýlyq saqtaý basqarmasy málim etkenindeı, oblysta pandemııa bastalǵannan beri barlyǵy 49 578 naýqas anyqtalsa, sonyń 9 221-i 2020 jyly, 30 849-y 2021 jyly, 9508-i bıyl tirkelgen.

Kúni búgin 751 tósektik 14 ınfektsııalyq statsıonarda 49 naýqas em qabyldaýda. Sonyń 10-y aýyr halde. Bulardyń úsheýi ınvazıvti jasandy tynys alý apparatyna, jeteýi ınvazıvti emes sondaı qurylǵyǵa qosylǵan.

Jyl basynan beri 39 naýqas koronavırýstan ómirden ozdy.

Basqarmadan túsken málimetke qaraǵanda, oblys boıynsha 271 867 adam (egilýge jatatyn turǵyndardyń 65,6 paıyzy) vaktsınanyń birinshi, 259 009-y (62,4 paıyzy) ekinshi komponentimen egildi.

Sondaı-aq 62 212 adam revaktsınatsııadan ótti. 10 398 adam Pfizer kompanııasynyń ekpesin saldyrsa, sonyń 384-i – júkti, 4 606-sy – bala emizetin áıelder, 5406-sy – jasóspirimder

jáne ekeýi – múgedekter.

Eske sala keteıik, budan buryn Batys Qazaqstanda revaktsınatsııadan ótken adam sany 61 myńnan asqanyn jazǵan bolatynbyz.