BQO-da jyl basynan beri 46 esirtki qylmysy tirkeldi
ORAL. QazAqparat - Batys Qazaqstan oblysynda bıylǵy eki aı jáne 15 kún ishinde 46 esirtki qylmysy tirkeldi, dep habarlaıdy «QazAqparat» HAA tilshisi.
BQO ishki ister departamentiniń baspasóz qyzmetinen túsken málimetke qaraǵanda, QR QK 297-baby 1, 2, 3-bólimderine sáıkes (esirtki zattaryn satý) 37 qylmystyq is qozǵaldy. Eki esitki uıasy áshkerelenip, Qazaqstan shekarasy arqyly Reseı aýmaǵyna kontrabandalyq jolmen esirtki zatyn tasymaldamaqshy bolǵandardyń 5 áreketiniń joly kesildi. Jyl basynan beri 2157,80 gramm esirtki zattary tárkilense, sonyń 2157,45 gramy marıhýana, 0,2573 gramy ekstraktsııalyq apıyn bolyp otyr.
Sonymen qatar jergilikti polıtsııa qyzmetkerleri kólik quraldaryn esirtkige eltigen kúıinde aıdaǵan 24 júrgizýshini ustady.
Jedel izdestirý sharalary nátıjesinde 1984 jylǵy A. degen azamattyń óz úıinde esirtki quraldaryn daıyndap, qoldanǵany belgili boldy. Tintý kezinde 5 plastıkalyq bótelke jáne ishinde suıyq zaty bar bir ret qoldanylatyn 4 shprıts tárkilendi. Saraptama qorytyndysyna sáıkes onyń ekstraktsııalyq apıyn ekendigi anyqtaldy. Ezilgen apıynnyń salmaǵy 704 mıllılıtrdi, qurǵaq esirtki zaty 8,06 gramdy qurady. Atalǵan derek boıynsha QR QK 302-baby 1-bólimine jáne 296-baby 4-bólimine sáıkes qylmystyq is qozǵalyp, ustalǵan turǵyn qamaýǵa alyndy.
Sol sekildi departamenttiń esirtki bıznesimen kúres basqarmasynyń qyzmetkerleri «Dopıng» jedel aldyn alý sharasy kezinde «Serik» degen azamatqa ekstraktsııalyq apıyn satqan 1973 jylǵy turǵyndy qolǵa túsirdi. Onyń da mekenjaıynan 3 plastıkalyq flakon men ishinde suıyq zaty bar bir ret qoldanylatyn eki shprıts tabyldy. Tárkilengen zattar saraptamaǵa jiberildi. Kúdikti Oral qalalyq ishki ister basqarmasy ýaqytsha oqshaýlaý ızolıatoryna qamalyp, bul qylmystyq is boıynsha da tergeý amaldary júrgizilýde.
