BQO-da jyl basynan beri 381 oqýshydan koronavırýs anyqtalǵan
NUR-SULTAN. QazAqparat - Oqý jyly bastalǵaly Batys Qazaqstan oblysynda mektep oqýshylary arasynda COVID-19-dyń 381 jaǵdaıy tirkelgen. Onyń 187-si offlaın formatta oqıtyn oqýshylar bolsa, 194 jaǵdaı qashyqtan oqıtyn oqýshylar arasynda tirkelgen, dep habarlaıdy QazAqparat Vedomstvoaralyq komıssııanyń baspasóz qyzmetine silteme jasap.
3 toqsan bastalǵaly (11 qańtardan bastap) oblys mektepteriniń oqýshylary arasynda 167 KVI juqtyrý faktileri tirkelgen. 89 oqýshy offlaın formatta, 78-y qashyqtan oqıtyn oqýshylar arasynda anyqtalǵan.
2021 jyldyń basynan Batys Qazaqstan oblysynyń aýmaǵyndaǵy memlekettik shekara beketteri arqyly 34 899 adam ótken. 6 955 jolaýshynyń 867-sinde COVID-19-ǵa teris nátıjesi kórsetilgen anyqtama bolmaǵan. Atalǵan jolaýshylar 3 táýlikke karantındik statsıonarǵa ornalastyrylyp, PTR ádisimen COVID-19 test alynǵan, 4 jolaýshynyń test qorytyndysy oń nátıje kórsetken.
Atalǵan aralyqta BQO aýmaǵy arqyly eki jaqty qatynasta halyqaralyq júk tasymaldaryn júzege asyratyn 18 265 júrgizýshi ótken. 5 850 júrgizýshiniń arnaıy anyqtamasy bolmaýyna baılanysty PTR ádisimen COVID-19 test alynyp, 7 júrgizýshiniń KVI juqtyrǵany anyqtalǵan.
