BQO-da jyl basynan beri 30,4 mln astam teńgeniń jalaqy bereshegi óteldi
ORAL. QazAqparat - Batys Qazaqstan oblysynda jyl basynan beri prokýratýra organdarynyń aralasýymen 30 mln 453,9 myń teńgeniń jalaqy bereshegi óteldi, dep habarlaıdy «QazAqparat» tilshisi.
BQO prokýratýrasynyń baspasóz qyzmetinen túsken málimetke qaraǵanda, mysaly, Bórli aýdany prokýratýrasynyń usynysymen «Transportnık» JShS-nyń 43 qyzmetkerge 2016 jyldyń sáýir-qazan aılarynda qordalanǵan 15 mln teńge eńbekaqy qaryzy óndirildi. Atalǵan kásiporynǵa BQO boıynsha eńbek ınspektsııasy basqarmasy QR Ákimshilik quqyqbuzýshylyq kodeksi 87-baby 1-bóligine sáıkes 226,9 myń teńge kóleminde aıyppul saldy.
Osylaısha, jyl basynan beri sharýashylyq júrgizý quqyǵyndaǵy «Gorkomhoz» MKK, «Assab» JShS jáne basqa kásiporyn-mekemelerde jumys jasaıtyn barlyǵy 177 qyzmetkerdiń konstıtýtsııalyq quqyǵy qorǵaldy.
