BQO-da júrgizýshiler aınalma jolmen júrý qıynǵa aınalǵanyn aıtyp shaǵymdandy
ORAL. KAZINFORM — Batys Qazaqstan oblysy Terekti aýdany Podstepnyı aýyly mańynda avtokóliktiń aınalma jolmen sý keship kele jatqany jóninde áleýmettik jelide beınejazba jarııalandy.
Instagram áleýmettik jelisinde turǵynnyń málim etkenindeı, sýdyń astynan shuńqyrdy baıqaý qıyn.
- Masqara jaǵdaı, munymen avtokólikti qurtamyz. Jazda shań tursa, endi sýdy sormasa bolmaıdy. Kózboıaýshylyqqa salynbaı, durys aınalma joldy nege salmaısyzdar? Nege adamdar zardap shegýi tıis? – deıdi turǵyn.
Taǵy bir júrgizýshi beınejazba jarııalap, aınalma jolmen júrýdiń múmkin emestigin aıtady.
Osyǵan baılanysty Kazinform tilshisi «QazAvtoJol» UK» AQ BQO fılıalynan máseleni anyqtady.
Fılıal dırektory Asylbek Mardannyń málimdeýinshe, aınalma jol Oral-Aqtóbe-RF shekarasy («Syrym» avtokólik ótkizý beketi) jáne Atyraý baǵytyndaǵy (0-16 km) jol aıryǵy qurylysy kezinde ýaqytsha salynǵan.
Onyń sózine qaraǵanda, qurylys talaptaryna sáıkes ınertti materıaldardy (qıyrshyq tas, qum-qıyrshyq tas qospasy) qoldana otyryp, aınalma joldarda ótpeli tósem tóseledi. Qazan aıynyń ortasynan bastap jańbyrdyń tolassyz jaýýyna baılanysty jolǵa balshyq jınalǵan.
- Degenmen merdiger uıym jol ýchaskesin sýdan tazartý jóninde sharalar qabyldady. Sondaı-aq jol jabynyn rettep, aqaýlardy joıý úshin jol tehnıkalary jiberildi. Budan bólek, qolaıly aýa raıy kezinde jol shógip ketken jerlerde qosymsha qospa tóseý jumystary atqarylatyn bolady. «QazAvtoJol» UK» AQ BQO fılıaly óz tarapynan ýaqytsha qolaısyzdyqtar úshin keshirim surap, aınalma jolda jol-kólik oqıǵalary týyndamaýy úshin júrgizýshilerden jyldamdyq rejımin saqtaýdy ótinedi. Kúni búgin barlyq kólik quraldary úshin aınalma jolmen júrý qamtamasyz etildi, - deıdi A.Mardan.
Onyń aıtýynsha, respýblıkalyq mańyzy bar Podstepnyı-Terekti-RF shekarasy («Aqsaı» avtokólik ótkizý beketi) avtojolyn (0-36 km) rekonstrýktsııalaý jobasyn bıyl aıaqtaý kózdelgen. Merdigeri – «Kazkomservıs» JShS.
- Jol ýchaskesi qurylysynyń uzyndyǵy – 37,1 kılometr. Jobamen tolyqtaı jańa jol jabynyn tósep, avtojoldy ІІ tehnıkalyq sanatqa aýystyrý kózdelgen. Sonymen qatar 2 jol aıryǵy, úsh jol ótkeli jáne sý ótkizetin 40 qurylym (temirbeton turbalar) salynýda, - dep qosty fılıal dırektory.
Eske sala keteıik, budan buryn Batys Qazaqstanda respýblıkalyq jol bóligi nelikten jóndelmeı qalǵanyn jazǵan bolatynbyz.