BQO-da júrgizýshi avtokólikti kýáliksiz aıdap, er adamdy qaǵyp ketti
BQO polıtsııa departamenti baspasóz qyzmetiniń ókili, polıtsııa maıory Darıǵa Májıtovanyń aıtýynsha, birinshi oqıǵa 3 sáýir kúni Oral-Podstepnyı tas jolynda boldy.
Onyń sózine qaraǵanda, saǵat 18.30-da «Folksvagen Passat» avtokóligi joldy kesip ótip bara jatqan jaıaý júrginshini qaǵyp ketti. Saldarynan 1961 jylǵy er adam ıyǵynan synyq jaraqatyn alyp, Oraldaǵy qalalyq kópbeıindi aýrýhanaǵa jatqyzyldy. Mán-jaıdy anyqtaý barysynda avtokólikti buryn júrgizýshi kýáliginen aıyrylǵan 1966 jylǵy er adamnyń júrgizgeni anyqtaldy. Osy derek boıynsha QR QK 345-baby 1-bóligine sáıkes sotqa deıingi tergeý amaldary bastalyp, avtokólik aıyp turaǵyna qoıyldy.
«Sol kúni BQO polıtsııa departamenti patrýldik polıtsııa batalonynyń ınspektorlary Oral-Atyraý jolynda 1989 jylǵy júrgizýshini qolǵa túsirdi. Ol ortasha aýyr dárejedegi mas kúıinde «VAZ-21140» avtokóliginiń rýline otyrǵan. Quqyq búzýshyǵa qatysty QR Ákimshilik quqyqbuzýshylyq kodeksi 608-baby 1-bóligine sáıkes hattama toltyrylyp, materıal sotqa jiberildi. Bul bap boıynsha aıypty dep tanylǵan adam 15-20 táýlikke ákimshilik qamaqqa alynyp, 7 jyl merzimge kólik quralyn basqarý quqyǵynan aıyrylady. Sondaı-aq 4 sáýir kúni saǵat 23.15-te Oralda V.Zaharov kóshesi 3-úıdiń janynda 1983 jylǵy júrgizýshi aıdap kele jatqan «Opel Omega» avtokóligi toqtatyldy. Júrgizýshi medıtsınalyq kýálandyrýǵa sáıkes jeńil dárejedegi mas kúıinde boldy. Onyń 2019 jyly 5 jyl merzimge júrgizýshi kýáliginen aıyrylǵany anyqtaldy. Bul derek boıynsha QR QK 346-baby 1-bóligine sáıkes sotqa deıingi tergeý amaldary júrgizilýde. Kólik júrgizý mádenıetiniń tómendigi, júrgizýshilerdiń jaýapsyzdyǵy saldarynan joldaǵy apat sany azaımaı tur. Bıylǵy úsh aıda óńirde 29 jol-kólik oqıǵasy tirkelip, sonyń saldarynan 4 adam qaza taýyp, 29-y túrli jaraqat aldy», dedi D.Májıtova.
Eske sala keteıik, budan buryn BQO-da 5-qabattan sekirmek bolǵan áıeldiń qutqarylǵanyn jazǵan edik.