BQO-da júrgizýshi 8 telefondy túrmege alyp ótip, satpaq bolǵan
BQO qylmystyq-atqarý júıesi departamentiniń baspasóz qyzmeti málim etkenindeı, oqıǵa qaýipsizdigi barynsha joǵary RÝ-170/3 túzetý mekemesinde boldy.
«Jedel qyzmetkerler júrgizýshiniń tyıym salynǵan zattardy, atap aıtqanda, uıaly telefondardy mekeme aýmaǵyna alyp ótýge daıyndalyp jatqany jóninde habar alǵan. N. degen jeke kásipkerge tıesili, J. esimdi júrgizýshi aıdaǵan kólik quralyn tekserý barysynda 8 uıaly telefon, sonsha zarıadtik qurylǵy jáne 3 naýshnık salynǵan orama tabyldy», dedi departament bastyǵynyń orynbasary, ádilet polkovnıgi Nııaz Ryspaev.
Oqıǵa ornyna jedel tergeý toby shaqyrylyp, tyıym salynǵan zattardy tárkileý aktisi jasaldy.
Qazirgi kezde osy derek boıynsha qyzmettik tekserý júrgizilýde. Sondaı-aq QR Ákimshilik quqyqbuzýshylyq kodeksiniń 481-babyna (qylmystyq-atqarý júıesi mekemelerinde, arnaýly mekemelerde ustalatyn adamdarǵa tyıym salynǵan zattar, buıymdar men nárseler berý) sáıkes sotqa joldaý úshin materıal jınaqtaldy.
