BQO-da jumys berýshi qyzmetkerge 51 mln teńge jalaqy qaryzyn tólemeı kelgen

ORAL. KAZINFORM — Batys Qazaqstan oblysynda jumys berýshi qyzmetkerge birneshe jyl boıy jalaqysyn tólemegen.

BQO jeke sot oryndaýshylary óńirlik palatasynan málim etkendeı, qordalanǵan qaryz 51 mln teńgeden asqan. 

«Boryshker óziniń mindettemesin oryndaýdy birneshe ret keıinge qaldyrǵannan keıin sot oryndaýshy batyl sheshimderge barǵan. Ol kompanııa esepshotyn tutqyndap, boryshkerdiń múlki esebinen óndirýdi usynǵan. Jumys berýshi qylmystyq qýdalaýdy qosqanda, zań qysymynan qutylý úshin qaryzdy óteýge májbúr bolǵan. Qaryz somasy úsh aıda ótelgen. Bul jaǵdaı jumys berýshilerdiń óz qyzmetkerleriniń eńbek quqyǵyn saqtaýdaǵy jaýapkershiligin arttyrýǵa septesedi» dep habarlady vedomstvodan. 

Eske sala keteıik, budan buryn Oralda kólik alyp beremin dep 2 turǵynnyń 5,3 mln teńgesin ıemdengen alaıaqtyń ustalǵanyn jazǵan bolatynbyz.