BQO-da júk tasymaldaýshylarǵa 6,3 mln astam teńge aıyppul salyndy
ORAL. KAZINFORM — Batys Qazaqstan oblysynda veterınarııalyq baqylaý beketterinde zań buzýshylyqtar anyqtaldy.
Aýyl sharýashylyǵy mınıstrligi Veterınarııalyq baqylaý jáne qadaǵalaý komıtetiniń BQO aýmaqtyq ınspektsııasynan málim etkenindeı, 8 shilde kúni «Tasqala» veterınarııalyq baqylaý beketinde Oraldan Reseı Federatsııasynyń Saratov qalasy baǵytynda 100 kg úırek etin tasymaldaǵan júk kóligi tekserildi.
Sondaı-aq 9 shilde kúni «Syrym» beketinde Reseı Federatsııasynyń Týla oblysy, Ýzlovaıa qalasynan Oral qalasyna kele jatqan, 17,6 tonna irimshik tıegen júk kóligine veterınarııalyq baqylaý júrgizildi.
Qujattamalyq tekserý barysynda eki jaǵdaıda da júkterdiń veterınarııalyq ilespe qujattarsyz tasymaldanǵany anyqtaldy.
Osyǵan baılanysty júk kólikteri shyǵý baǵytyna keri qaıtarylyp, júrgizýshilerge QR Ákimshilik quqyq buzýshylyq týraly kodeksiniń 406-baby boıynsha hattamalar toltyrylyp, aıyppul salyndy.
Sonymen qatar júk tasymaldaýshylarǵa Eýrazııalyq ekonomıkalyq komıssııasynyń 2010 jylǵy 18 maýsymdaǵy № 317 sheshimimen bekitilgen «Eýrazııalyq ekonomıkalyq odaqta veterınarııalyq-sanıtarııalyq sharalardy qoldaný týraly» talaptar túsindirildi.
— Jyl basynan beri Batys Qazaqstan oblysynda osyndaı 170 zań buzýshylyq belgili bolyp, 170 avtokólik shyǵý baǵytyna keri qaıtaryldy. 71 júk tasymaldaýshyǵa ákimshilik hattama toltyrylyp, 6 mln 314,5 myń teńge aıyppul salyndy, — dep habarlady vedomstvodan.
Eske sala keteıik, budan buryn BQO-da saýda zańnamasyn buzǵan 100-den astam kásipker jaýapkershilikke tartylǵanyn jazǵan edik.
