BQO-da júk tasymaldaýshylar tarapynan 200-den astam zań buzýshylyq anyqtaldy
ORAL. KAZINFORM — Batys Qazaqstan oblysynda jyl basynan beri veterınarııalyq baqylaý beketterinde 208 zań buzýshylyq tirkelip, sonshama avtokólik shyǵý baǵytyna keri qaıtaryldy.
Aýyl sharýashylyǵy mınıstrligi Veterınarııalyq baqylaý jáne qadaǵalaý komıteti BQO aýmaqtyq ınspektsııasynan málim etkenindeı, 89 júk tasymaldaýshyǵa ákimshilik hattama toltyrylyp, barlyǵy 7 mln 958 myń teńge aıyppul salyndy.
Inspektsııa málimetine qaraǵanda, 18 tamyz kúni «Syrym» veterınarııalyq baqylaý beketinde Reseı Federatsııasynyń Máskeý oblysy Naro-Fomınsk aýdanynan Qazaqstan Respýblıkasynyń Shymkent qalasyna baǵyt alǵan júk kóligi tekserildi.
Atalǵan avtokólik salmaǵy 14 tonna qoıdyń ishki aǵzalary men ylǵaldy tuzdalǵan qoı ishekterin tasymaldap kele jatqan.
— Qarap-tekserý barysynda atalǵan ónimderdiń Reseıdiń Máskeý oblysynan Qazaqstanǵa ákelinýine 2018 jyldan beri ýaqytsha shekteý engizilgeni anyqtaldy. Osyǵan baılanysty júk kóligi shyǵý baǵytyna keri qaıtaryldy. Oǵan qosa júrgizýshige QR Ákimshilik quqyq buzýshylyq týraly kodeksiniń 406-baby boıynsha hattama toltyrylyp, aıyppul salyndy. Inspektsııa júk tasymaldaýshylar men syrtqy ekonomıkalyq qyzmetke qatysýshylarǵa Qazaqstan Respýblıkasynyń jáne Eýrazııalyq ekonomıkalyq odaqtyń veterınarııalyq-sanıtarııalyq talaptaryn qatań saqtaý kerektigin eske salady, — dep habarlady vedomstvodan.
Eske sala keteıik, budan buryn BQO-da veterınarııalyq talaptyń buzylýyna baılanysty 18,4 tonna ónim keri qaıtarylǵanyn jazǵan edik.
