BQO-da júk poıyzy 14 jylqyny qaǵyp ketti
ORAL. QazAqparat – Batys Qazaqstan oblysynda júk poıyzy 14 jylqyny qaǵyp ketti, dep habarlaıdy QazAqparat tilshisi.
QR ІІM kóliktegi polıtsııa departamentiniń baspasóz qyzmeti málim etkenindeı, temir jol jolaǵynda malyn bos jibergeni úshin 14 jylqynyń ıesi ákimshilik jaýapkershilikke tartyldy.
Departament bastyǵynyń birinshi orynbasary, polıtsııa polkovnıgi Qalıjan Qoblandınniń aıtýynsha, 11 aqpan kúni Oral stansasyndaǵy jelilik polıtsııa bólimine dıspetcherden «Sulýsaı-Jarkıı» stansasy mańynda temir jol boıynda júrgen 14 jylqyny qaǵyp ketýine baılanysty mashınıst júk poıyzyn kilt toqtatqany jóninde habar túsken. Barlyq mal ólgen. Poıyz 46 mınýt boıy toqtap turǵan.
Tekserý barysynda kólik polıtseıleri jylqynyń ıesin tapty. Ol Aqsaı qalasynyń 35 jasar turǵyny bolyp shyqty.
Oǵan QR Ákimshilik quqyqbuzýshylyq kodeksi 559-baby 1-bóligine (temirjol arqyly at-arba kóligimen (shanalarmen) ótý jáne júk artylǵan, minis maldy jáne tabyndy aıdap ótý, temirjoldardyń bólingen jolaǵynda mal jaıý qaǵıdalaryn buzý) sáıkes ákimshilik hattama toltyryldy.
«Jyl basynan beri poıyzdardy kilt toqtatýdyń 198 deregi tirkelse, sonyń 147-si temirjol jolaǵynda maldyń júrýine baılanysty. Sonyń ishinde 77 jylqy, 10 túıe, 57 iri qara qaǵylǵan. Temirjol jolaǵynda malyn jaıǵany úshin 85 turǵyn ákimshilik jaýapkershilikke tartyldy», dedi Q.Qoblandın.
