BQO-da júk kóligin jóndeý kezinde júrgizýshi kóz jumdy
BQO polıtsııa departamenti baspasóz qyzmetiniń ókili, polıtsııa maıory Darıǵa Májıtovanyń aıtýynsha, oqıǵa 4 sáýir kúni shamamen saǵat 16.40-ta Aqsaı qalasy Baldyrǵan kóshesinde boldy.
Onyń sózine qaraǵanda, 1976 jylǵy júrgizýshi úıiniń aýlasynda óziniń «Gaz SAZ 35071» (samosval) kóligin jóndegen. Tormoz suıyǵyn aǵyzý kezinde ol kóliktiń astynda jatyp, kámeletke tolmaǵan 2009 jylǵy ulyna kabınaǵa otyryp, mashınany otaldyryp, tormoz tepkishin basyp, ózine kómektesýin ótingen.
«Bul kezde berilis qoraby qosýly bolǵan avtokólik ózdiginen alǵa júrip, er adamdy basyp ketken. Saldarynan er adam aýrýhananyń jansaqtaý bóliminde qaıtys boldy. Atalǵan derek QR QK 345-baby 3-bóligine sáıkes tirkeldi», dedi D.Májıtova.
Eske sala keteıik, budan buryn BQO-da 5-qabattan sekirmek bolǵan áıeldiń qutqarylǵanyn jazǵan edik.