BQO-da júk kóligi órtenip, jalyn qurǵaq shópke aýysty

ORAL. QazAqparat - Batys Qazaqstan oblysynda júk kóligi órtenip, jalyn qurǵaq shópke aýysty, dep habarlaıdy QazAqparat tilshisi.

BQO TJ departamentiniń baspasóz qyzmetinen túsken málimetke qaraǵanda, oqıǵa 7 shilde kúni Syrym aýdany Toǵanas aýyly tusynda boldy.

«Saǵat 12.20-da 101 pýltine Samara-Shymkent tas joly boıynda júk kóliginiń órtenip jatqany jóninde habar túsken. Oqıǵany barlaý barysynda Samara-Shymkent jolynyń 320-shaqyrymynda jartylaı tirkemesimen aýyr júk kóligi janyp, jalynnyń qurǵaq shópke aýysqany anyqtaldy. Júk kóligindegi órt saǵat 14.30-da oqshaýlandy. Qurǵaq shóptiń janýyn sóndirý jalǵasýda, onyń aýmaǵy anyqtalý ústinde. Órt ornynda túrli mekemelerden 22 adam, 5 tehnıka jumys jasap jatyr», dep habarlady vedomstvodan.

Eske sala keteıik, budan buryn Batys Qazaqstanda ormanǵa jaqyn aýmaqta qurǵaq shóp janǵanyn jazǵan bolatynbyz.