BQO-da Juban Moldaǵalıevtiń 105 jyldyǵyna oraı jańa kitaptyń tusaýy kesildi
ORAL. KAZINFORM – Aqyn, KSRO jáne Qazaqstan Memlekettik syılyǵynyń ıegeri, Qazaqstannyń halyq jazýshysy Juban Moldaǵalıevtiń 105 jyldyǵyna oraı týǵan jeri – Aqjaıyq aýdanynda mereıtoılyq is-sharalar máresine jetti.
Mereıtoı aldymen aýdan ortalyǵyndaǵy Juban eskertkishine gúl shoǵyn qoıý rásimimen bastaldy.
Saltanatty is-sharada BQO ákimi apparatynyń basshysy Nurdildá Oraz qazaq halqy barda qylyshynan qan tamǵan keńes dáýiriniń ózinde «Men – qazaqpyn» dep jahanǵa jar salǵan Jubannyń rýhy máńgi óshpeıtinin atap ótti.
Budan keıin Juban ortalyǵynda «Juban Moldaǵalıev. Estelikter. Tarıhı-ǵumyrderektik anyqtamalyq» kitabynyń tanystyrylymy boldy. Ony qurastyrǵan jergilikti jıdashy-qalamger Baqtyǵalı Qospaev.
Atalǵan eńbek budan bes jyl buryn aqynnyń 100 jyldyǵyna oraı alǵash ret basylǵan. Bul joly Juban Moldaǵalıevtiń ómiri men shyǵarmashylyǵyna qatysty tyń derekter, kózkórgenderdiń estelikterimen tolyqtyryldy. Sonymen qatar aqynnyń týǵan jeriniń tarıhyna qatysty geografııalyq ataýlar men eldi mekender týraly qundy derekter de engizildi.
Kitaptyń tanystyrylymynda Juban Medetov esimdi jasóspirim Jubannyń «Men qazaqpyn» poemasynan úzindi oqyp berdi. Aqyn, Memlekettik syılyqtyń ıegeri Aqushtap Baqtygereeva bala Jubanǵa rııasyz tilegin bildirip, osy sharaǵa arnaıy kelgen aqyn attas uldarǵa syılyq tabys etti.
J.Moldaǵalıevpen birge «Edil men Jaıyq» ánin jaryqqa shyǵarǵan Qazaqstannyń Eńbek Eri Ilıa Jaqanov Juban ortalyǵyna óziniń ánder jınaqtary, kitaptaryn tartý etti.
«Tarıh. Taǵdyr. Tulǵa: Juban Moldaǵalıev murasy» atty respýblıkalyq-aımaqtyq ǵylymı-tanymdyq konferentsııada aqyn shyǵarmashylyǵyna taldaý jasaldy. «Dáýir daýylpazy – Jyr-Juban» oblystyq aqyndar aıtysyna óńirden 12 aqyn qatysyp, baq synady.
Aqjaıyq jurtshylyǵy Jeltoqsan kóterilisi kezinde batyrlyǵymen kózge túsip, jastardy qorǵaǵan Juban Moldaǵalıevke «Halyq qaharmany» ataǵyn berý týraly kópten beri aıtyp, usynys berip keledi. Mereıtoı barysynda bul da sóz bolmaı qalǵan joq.
Juban toıy dala qyzyqtarymen qorytyndylandy.
Eske sala keteıik, budan buryn BQO-da Qadyr Myrza Áliniń 90 jyldyǵyna arnalǵan mereıtoılyq is-sharalar máresine jetkenin jazǵan bolatynbyz.