BQO-da jiti ishek juqpasymen aýyrǵandar sany 300-den asty
ORAL. KAZINFORM — Batys Qazaqstan oblysynda jyl basynan beri 314 adamnyń jiti ishek juqpasyna shaldyqqany tirkeldi.
BQO sanıtarııalyq-epıdemıologııalyq baqylaý departamenti basshysy orynbasarynyń mindetin atqarýshy Mıra Qaýymbaevanyń málim etkenindeı, bul 100 myń turǵynǵa shaqqanda, 45,14-ten keledi.
Ótken jyldyń osy kezeńimen (382) salystyrǵanda, syrqattanýshylyq 17,8 paıyzǵa tómendedi.
Mıra Nurlanqyzynyń sózine qaraǵanda, aýyrǵandar sany azaıǵanyna qaramastan, jiti ishek juqpalarynyń aldyn alý sharalaryn saqtaý ózektiligin joǵaltpaıdy. Ásirese, jazǵy jáne jyly mezgilderde aýrýdyń taralý qaýpi artady.
Infektsııanyń negizgi berilý joldary — las qol, sapasyz nemese lastanǵan taǵam ónimderi jáne aýyz sý arqyly juǵýy yqtımal.
— Jiti ishek juqpalary — asqazan-ishek joldarynyń qyzmetin buzatyn, kóbine bakterııalar men vırýstardan týyndaıtyn juqpaly aýrýlar toby. Aýrýdyń negizgi belgilerine ishtiń aýyrýy, júrek aınýy, qusý, ish ótý, dene qyzýynyń kóterilýi jáne jalpy álsizdik jatady, — deıdi M.Qaýymbaeva.
Onyń aıtýynsha, aýrýdyń aldyn alý úshin, ásirese, tamaq isher aldynda, dárethanadan keıin jáne kósheden kelgen soń qoldy sabynmen muqııat jáne jıi jýý qajet.
Sondaı-aq tek qaýipsiz, qaınatylǵan nemese sapasy tekserilgen aýyz sýdy paıdalaný, jemis-jıdek pen kókónisterdi muqııat jýý mańyzdy.
Et, qus eti, jumyrtqa jáne basqa da taǵam ónimderin tolyq termııalyq óńdeýden ótkizip, shıki jáne daıyn taǵamdardy bólek saqtap, taǵam daıyndaý kezinde jeke kesý taqtaılary men pyshaqtardy paıdalanǵan durys.
Sol sekildi tez buzylatyn taǵam ónimderin tońazytqyshta ustaý jáne olardyń jaramdylyq merzimin qatań saqtaý, taǵam ónimderin belgilenbegen jerlerden satyp almaý kerek.
Oǵan qosa daıyn taǵamdy bólme temperatýrasynda uzaq ýaqyt qaldyrmaý, as úıde tazalyq pen jeke bas gıgıenasyn saqtaý qajet.
— Jiti ishek juqpalarynyń alǵashqy belgileri baıqalǵan jaǵdaıda ózdiginen em qabyldamaı, medıtsınalyq kómekke júgingen jón. Ásirese, balalarda qusý men ish ótý kezinde aǵzanyń sýsyzdanýy tez damýy múmkin, — dep qosty M.Qaýymbaeva.
Eske sala keteıik, budan buryn Batys Qazaqstanda kókjótelge shaldyqqandar sany 60-qa jýyqtaǵanyn jazǵan edik.
