BQO-da JRVI juqtyrǵandardyń 6 myńnan astamy – balalar
ORAL. KAZINFORM — Batys Qazaqstan oblysynda 1 qazannan beri 9 062 adamnyń jiti respıratorlyq vırýstyq ınfektsııa (JRVI) juqtyrǵany tirkeldi.
BQO sanıtarııalyq-epıdemıologııalyq baqylaý departamenti basshysy orynbasarynyń mindetin atqarýshy Mıra Qaýymbaevanyń málim etkenindeı, sonyń ishinde 6 075-i 14 jasqa deıingi balalar bolsa, 23-i – júkti áıelder.
Mıra Nurlanqyzynyń sózine qaraǵanda, epıdemıologııalyq maýsym bastalǵannan beri oblys aýmaǵynda tumaý ınfektsııasynyń zerthanalyq rastalǵan deregi tirkelgen joq.
Tumaý men JRVI-diń aldyn alý maqsatynda óńirde profılaktıkalyq jáne epıdemııaǵa qarsy is-sharalar júrgizilýde. Halyqty tumaýǵa qarsy vaktsınatsııamen qamtýǵa erekshe kóńil bólinýde.
- Oblys boıynsha tumaýǵa qarsy 68 myń adamdy vaktsınatsııalaý kózdelgen bolatyn. Kúni búginge deıin 60 916 adam ekpe aldy. Bul –josparlanǵan kórsetkishtiń 89,58 paıyzy. Egilgenderdiń 5 879-y – balalar, 55 037-si – eresekter. Sonymen qatar medıtsınalyq qyzmetkerler arasynda 6 378 adam, oǵan qosa 688 júkti áıel tumaýǵa qarsy vaktsınamen qamtyldy, - deıdi M.Qaýymbaeva.
Onyń aıtýynsha, tumaýǵa qarsy vaktsınatsııa – aýrýdyń aldyn alýdyń jáne onyń aýyr aǵymynan, yqtımal asqynýlarynan qorǵanýdyń tıimdi joldarynyń biri. Ásirese, balalar, júkti áıelder, medıtsına qyzmetkerleri jáne sozylmaly aýrýlary bar adamdar úshin ekpeniń mańyzy zor.
Budan bólek, turǵyndarǵa maýsymdyq respıratorlyq ınfektsııalardyń aldyn alý maqsatynda jeke gıgıena talaptaryn saqtaý, qoldy jıi jýý, bólmelerdi turaqty jeldetý, adamdar kóp jınalatyn oryndarda saqtyq sharalaryn ustaný usynylady. Aýrý belgileri baıqalǵan jaǵdaıda ózdiginen emdelmeı, medıtsınalyq kómekke júginý qajet.
Eske sala keteıik, budan buryn BQO-da qyzylshamen aýyrǵandar sany 17 esege jýyq artyp ketkenin jazǵan edik.
