BQO-da JRVI-men syrqattanýshylar sany 2,6 esege ósti
BQO sanıtarlyq-epıdemıologııalyq baqylaý departamenti basshysynyń orynbasary Gúldana Kereevanyń aıtýynsha, 2020 jyly osy kezeńde JRVI-men aýyrǵan 9515 adam tirkelse, bıyl 24 898-ge jetti.
Sondaı-aq óńirde tumaý (grıpp) órship tur. 1 qarashadan bastap zerthanalyq zertteý nátıjeleri boıynsha 91 turǵynnan tumaýdyń A (H3N2) túri anyqtaldy. Ótken 2020- 2021 jylǵy epıdemıologııalyq maýsymda tumaýǵa shaldyqqandar bolmaǵan edi.
«JRVI men tumaýmen aýrýshylardyń kóbeıýine baılanysty bilim berý uıymdarynda buqaralyq jáne oıyn-saýyq is-sharalaryn ótkizýge shekteý qoıyldy», dedi G.Kereeva.
Onyń sózine qaraǵanda, oblysta «Ashyq» jobasy boıynsha koronavırýs juqtyrǵan jáne olarmen baılanysta bolǵan adamdarǵa qatysty tıisti is-sharalar júrgizilýde.
Atap aıtqanda, 1 jeltoqsannan beri úılerinde oqshaýlanýy tıis 38 adamnyń «Ashyq» jobasymen jumys isteıtin nysandarǵa barǵany belgili boldy. Bulardyń 35-i – «qyzyl», úsheýi – «sary» mártebesi bar adamdar.
«Bıylǵy 10 maýsymnan beri 179 adamǵa ákimshilik hattama toltyryldy. QR Ákimshilik quqyqbuzýshylyq kodeksi 425-baby 1-bóligine sáıkes karantın talabyn buzǵandarǵa 7,8 mln
astam teńge aıyppul salyndy», dedi departament basshysynyń orynbasary.
Eske sala keteıik, budan buryn «Omıkron» shtamyna baılanysty BQO-da shetelden kelgen 100-den astam qazaqstandyq baqylaýǵa alynǵanyn, pandemııa bastalǵannan beri indet juqtyrǵandar sany 40 myńnan asqanyn jazǵan bolatynbyz.