BQO-da jóndelgen joldan anyqtalǵan 431 aqaýdyń 30 paıyzy joıylmaǵan
ORAL. KAZINFORM — Memleket basshysynyń 2026 jylǵy 28 qazandaǵy Qazaqstan halqyna Joldaýynda elimizdiń tranzıttik áleýetin odan ári arttyrý, sondaı-aq barlyq deńgeıdegi avtomobıl joldarynyń sapasyn qamtamasyz etý máselelerine erekshe nazar aýdaryldy. Osy baǵytta birqatar naqty mindetter qoıyldy.
«Jol aktıvteri sapasynyń ulttyq ortalyǵy» RMK BQO fılıalynyń dırektory Nurtilek Hasenovtiń Kazinform tilshisine málim etkenindeı, búginde Batys Qazaqstan oblysynda avtomobıl joldarynyń sapasyn jaqsartý jáne jol ınfraqurylymyn jańǵyrtý baǵytynda tıisti jumys istelip jatyr.
Nurtilek Nurhatulynyń sózine qaraǵanda, oblystaǵy avtomobıl joldarynyń jalpy uzyndyǵy — 6 063 shaqyrym.
Onyń ishinde 1 349 shaqyrymy — respýblıkalyq, 4 714 shaqyrym — jergilikti mańyzy bar avtomobıl joldary.
Bıyl oblysta 422 shaqyrym avtomobıl jolyn rekonstrýktsııalaý, kúrdeli jáne ortasha jóndeý jumystary júrgizilip jatyr. Onyń 308 shaqyrymy respýblıkalyq, 114 shaqyrymy jergilikti mańyzy bar joldarǵa tıesili.
Qazirgi tańda respýblıkalyq mańyzy bar Atyraý-Oral, Podstepnyı-Terekti-RF shekarasy, Chapaev-Jalpaqtal-Qaztalov-RF shekarasy, Aqtóbe-Oral-RF shekarasy avtomobıl joldarynyń jekelegen ýchaskelerinde júrgizilip jatqan jóndeý jumystary aıaqtalýǵa jaqyn.
— Jol jóndeý jumystarynyń sapasy «Jol aktıvteri sapasynyń ulttyq ortalyǵy» Batys Qazaqstan oblysy fılıalynyń baqylaýynda. Jyl basynan beri oblystaǵy jol nysandaryna 422 baqylaý júrgizilip, jol-qurylys materıaldarynyń 1 658 synamasy zerthanalyq zertteýden ótkizildi. Zertteý nátıjesinde 375 synamadan nemese 22 paıyzynan qoldanystaǵy talaptarǵa sáıkes kelmeıtin kórsetkishter anyqtaldy, — deıdi Nurtilek Hasenov.
Onyń aıtýynsha, sonymen qatar jóndelgen jol ýchaskelerinde 431 aqaý tirkelip, olardyń shamamen 30 paıyzy qazirgi ýaqytqa deıin joıylmaǵan. Anyqtalǵan sáıkessizdikter men aqaýlardyń barlyǵy tıisti baqylaý júrgizý jáne olardyń joıylýyn qadaǵalaý maqsatynda KazRoadLab aqparattyq júıesine engizildi.
Jol sapasyn baqylaýdyń negizgi maqsaty — anyqtalǵan kemshilikterdi ýaqytyly joıýdy qamtamasyz etý jáne talapqa saı kelmeıtin jumystardyń qabyldanýyna jol bermeý. Osyǵan baılanysty jol nysandaryndaǵy anyqtalǵan aqaýlar men sáıkessizdikter tolyq joıylyp, jumys sapasynyń belgilengen talaptarǵa sáıkes kelýin qamtamasyz etý mańyzdy.
— «Jol aktıvteri sapasynyń ulttyq ortalyǵy» tarapynan anyqtalǵan kemshilikterdi joıý, jol-qurylys materıaldarynyń sapasyn baqylaý jáne júrgizilip jatqan jumystardyń normatıvtik talaptarǵa sáıkestigin qamtamasyz etý baǵytynda tıisti sharalar qabyldanyp jatyr, — dep qosty fılıal dırektory.
Eske sala keteıik, budan buryn BQO-da jol-qurylys materıaly synamasynyń 220-dan astamy talapqa saı bolmaı shyqqanyn jazǵan edik.
